स्वीट्जरल्याण्डय् जूगु मिसा युरोकपया सिरपा इंग्ल्यान्डं रक्षा याःगु दु ।
आइतबाः जूगु फाइनलय् विश्व विजेता स्पेनयात पेनाल्टी सुटआउटय् ३–१ गोलं बुकाः इंग्ल्यान्डं सिरपा त्याकूगु खः । थ्व स्वयां न्ह्यःया संस्करणय् नं इंग्ल्यान्डं हे सिरपा त्याकूगु खः ।
थ्व उपाधिलिसें इंग्ल्याण्डं सन् २०२३ य् अष्ट्रेलियाय् जूगु मिसा विश्वकपया फाइनलय् स्पेनलिसे बूगुया बदला कायेत नं सफल
जुल । उगु फाइनलय् स्पेनं इंग्ल्याण्डयात १–० गोलं बुकूगु खः । थुगु कासाय् नं स्पेनं न्हापालाक्क गोल याःगु खः । तर, विश्वकपय्
थें नतिजा पिहांमवल ।
नियमित इलय् १–१ गोलं बराबरी जुइवं कासा अतिरिक्त इलय् वंगु खः । गुकी निगुलिं टिमं गोल यायेगु ह्वःताः चूलाकूगु खः, तर गोल धाःसा मजुल । थ्वयां लिपा निर्णयया निंतिं पेनाल्टी सुटआउटया सहारा काःगु खः । गुकी इंग्ल्यान्डं ५ पेनाल्टी मध्ये ३ पेनाल्टी गोल याःगु खःसा स्पेनं ४ पेनाल्टी मध्ये १ गोल जक यायेफूगु खः । न्यागूगु पेनाल्टी धाःसा स्पेनं थ्वाय म्वाल ।
थ्व स्वयां न्ह्यः २५ औं मिनेटय् गोल यानाः मेरियोना काल्डेन्टीं स्पेनयात १–० गोलं अग्रता ब्यूगु खः धाःसा वय्कलं हे हेडर गोल
यात । अनं लिपा निगूगु हाफय् इंग्ल्याण्डं १–१ गोलया बराबरी याःगु खः । कासाया ५७ औं मिनेटय् रुसों हेडर गोल याःगु खः ।
