येँ/साहित्यिक संस्था अन्तर–विधाया खुक्वःगु ज्याझ्वःकथं साहित्यकार/पत्रकार हिक्कमत डंगोलं च्वयादीगु नेपाली भाषाया उपन्यास ‘बदलिएको आकाश’ या विमोचन जुल । उगु उपन्यासयात कयाः पाहाँपिं वरिष्ठ पत्रकार कपिल काफ्ले, साहित्यकार ओमशंकर श्रेष्ठ, साहित्यकार अञ्जु मैनालीं थःथःगु बिचाः तयादीगु खः ।
वरिष्ठ पत्रकार कपिल काफ्लें उपन्यासया गहन विश्लेषण यासें च्वमिं ल्ह्वंगु सामाजिक, मनोवैज्ञानिक व प्रवासी जीवनया विविध पक्षयात कयाः थःगु बिचाः तयादिल । अथे हे साहित्यकार ओमशंकर श्रेष्ठं समय–परिवेश व समकालीन सामाजिक यथार्थया बारे दुग्यंक अध्ययनलिपा सिर्जना याःगु कृति जूगुलिं थुकिं नेपाली डायस्पोराया अनुभवयात बिस्कं दृष्टिं न्ह्यब्वगु खँ धयादिल ।
उपन्यासय् थःगु अनुभवनापं मेमेपिं पात्रया जीवन नं दुथ्याका मूलतः दुःखान्त जुइगु बाखंयात पाठकपिनिगु सम्वेदनशीलतायात ध्यानय् तयाः सुखान्त रुपं क्वचायेकागु व डायस्पोराया नेपाःमिया जीवनयात बिस्कं दृष्टिकोणं न्ह्यव्वयेगु कुतः यानागु खँ च्वमि हिक्कमत डंगोलं धयादिल ।
साहित्यकार अञ्जु मैनालीं न्ह्याकादीगु उगु विमोचन ज्याझ्वःलिपा जूगु अन्तरक्रिया ज्याझ्वलय् ब्वतिकापिन्सं उपन्यासया विविध पक्षयात कयाः तःगु थीथी न्ह्यसःया लिसः च्वमि डंगालं बियादीगु खः । थुगु हे ज्याझ्वलय् नेपाली कला, साहित्य व समाजसेवाय् योगदान बियादीपिं साहित्यकारपिं ओमशंकर श्रेष्ठ, चन्द्रा श्रेष्ठ व महेन्द्र शाक्ययात हंगु खः ।
