येँ/फाइट फर लाइफ नेपाल व नेप्लीज फेसन होमया ग्वसालय् जूगु १९औँ संस्करणया नेपाल टेलिकम मिस नेवाः नेपाल – ११४६ या उपाधि यलया तिशा शाक्यं त्याकल । नेपाल प्रज्ञा प्रतिष्ठानय् जूगु उगु प्रतियोगिताय् १६ म्ह प्रतिस्पर्धीयात ल्यूने लाकाः वय्कलं मू उपाधिनापं नगद १ लाख तका व गोदावरी नगरपालिका बेस्ट नेपालभाषाया उपाधिनापं थप १० हजार नगद नं त्याकेत ताःलाःगु खः ।
प्रतियोगिताय् सारिका महर्जन फस्ट रनर्सअप व जेसिका श्रेष्ठं सेकेन्ड रनर्सअपया उपाधिनापं छसिकथं ५० हजार व २५ हजार नगद त्याकल । अथे हे सबनम शाक्य मिस ट्यालेन्ट, हिमानी प्रधान मिस ट्यालेन्ट फस्ट रनर्सअप व करुणा चक्रधर सेकेन्ड रनर्सअप जुल । करुणा चक्रधर व शिक्षा महर्जन सोसियल वेलफेयर एम्बेसडर चिफ घोषित जुल धाःसा वहे विधाय् सारिका महर्जन फस्ट रनर्सअप व दृष्टि महर्जन सेकेन्ड रनर्सअप जुइत ताःलात ।
दुर्गा देउला मिस डिसिप्लिन, हिमानी प्रधान मिस पब्लिक च्वाइस व प्रिस्टिन अवाले बेस्ट ड्रेस घोषित जुल धाःसा मिस कल्चरया उपाधि शिक्षा महर्जनं व बेलाभिटा मिस पर्सनालिटीया उपाधि निश्ला महर्जनं त्याकल । अथे हे बेस्ट हेयरको उपाधि कलशा अवाले, बेस्ट स्किन दृष्टि महर्जन, मिस फोटोजेनिक सारिका महर्जन, मिस स्माइल अनुष्का नकर्मी व मिस चार्मिङ सोनिया महर्जन, मिस फ्रेन्डसिप रेजिना बज्राचार्य जुइत ताःलात ।
नमुना कलेज अफ फेसन टेक्नोलोजीकी संस्थापक प्रिन्सिपल ज्ञानीशोभा तुलाधर प्रमुख निर्णायक जुयादीगु थुगु प्रतियोगिताय् अधिवक्ता लक्ष्मण महर्जन, नमुना कलेज अफ फेसन टेक्नोलोजीया भाइस प्रिन्सिपल जीवेश्वरलाल श्रेष्ठ, नेपाल लिपि गुठीया पूर्वअध्यक्ष अनिल स्थापित, सञ्चारकर्मी रोहन श्रेष्ठ, नेपाल क्यान्सर हस्पिटल एन्ड रिसर्च सेन्टरया सहसंस्थापकनापं निर्देशक स्वरूपा श्रेष्ठ व नेपाल क्यान्सर रिलिफ सोसाइटी येँ शाखाया सचिव प्रा. दिव्यलक्ष्मी बज्राचार्य निर्णायक जुयादीगु खः ।
येँ महानगरपालिकाया कार्यवाहक प्रमुखनापं पूर्व मिस नेवाः सुनिता डंगोलया मूपाहाँसुइ जूगु उगु प्रतियोगिताय् ग्वसाःखलः नेप्लीज फेसन होमया अध्यक्ष हेमा मानन्धरं नेवाः समुदायया भाषा, संस्कृति, कला व सामाजिक चेतना प्रवद्र्धन यायेगु उद्देश्यं मिस नेवाः प्रतियोगिता यानाः वयाच्वनागु व थुगु प्रतियोगिताय् सौन्दर्यनापं प्रतियोगीपिनिगु प्रतिभा, व्यक्तित्व, अनुशासन, आत्मविश्वास व सामाजिक उत्तरदायित्वया थीथी पक्षयात कःघानागु खँ धयादिल ।
फाइट फर लाइफ नेपालया वरिष्ठ सल्लाहकारनापं नेपाल क्यान्सर रिलिफ सोसाइटी येँ शाखाया उपाध्यक्ष प्रा. डा. विमला शाक्यया सभापतित्वय् जूगु उगु प्रतियोगिताय् रोजिन शाक्यं कोरियोग्राफी व ज्याझ्वः न्ह्याकूगु खःसा, मिस नेवाः प्रलिशा शाक्य व मिस नेवाः सोसियल वेलफेयर एम्बेसडर चिफ तिमिला महर्जनया सह–संयोजन अले मिस नेवाः सकिना महर्जन व कृषा महर्जनया संयोजनय् ज्याझ्वः जूगु खः ।
