साउन २९ गते ऐतिहासिक उपाकलं सायाः (नृसिंह जात्रा) जुइगु

यल/ नेपाल सम्वत् ७५१ निसें निरन्तर न्ह्यानावयाच्वंगु ऐतिहासिक नृसिंह जात्रा उपाकलं सायाः थुगुसी साउन २९ गते गुँलागा: पंचमीकुन्हु जुइ । उपाकर्म गुथिया ग्वसालय् गुथिया वरिष्ठताया आधारय् पाः कयाः न्ह्याकीगु थुगु जात्रा थुगुसी मधुर शर्मा राजोपाध्यायया परिवारयात पाःलाःगु दु । पाःकाःम्हेसित उपाकर्म गुथि व्यवस्थापन समिति, श्री नृसिंह जात्रा व्यवस्थापन समिति व श्रीनृसिंह जात्रा समारोह समितिं जात्रा न्ह्याकेत माःगु ग्वाहालि याइ ।
नृसिंह जात्राया न्हापांगु विधिकथं मल्ल जुजुयात स्वां तःवनेगु धकाः पाःलाःम्ह मधुर शर्मा राजोपाध्यायया नेतृत्वय् पाटन दरबार स्क्वायर दुनेया तुसाहितिइ दुगु ल्वहंया खाताय् स्वां, फलफुल, जनै, ग्वय् लगायतया ज्वलं तयाः निमन्त्रणा बीगु ज्या गुरुपुन्हिकुन्हु गुथि संस्थान यलया प्रमुखया उपस्थितिइ क्वचाल ।
प्राकृतिक प्रकोपं बचेजुइत, जनकल्याण व विश्व शान्तिया कामना यासें थुगु जात्रा न्याय्काः वयाच्वंगु खँ ग्वसाः खलकं धाःगु दु । कात्ति प्याखनय् पिहां वइम्ह नृसिंह उग्र रुपयाम्ह खः धाःसा जात्राय् पिहां वइम्ह नृसिंह शान्त स्वभावम्ह खः धइगु धापू दु । थुगु जात्रा पुञ्चलिं न्ह्यानाः गाःबहाः, प्यंगःथां, पिम्बहाः, बालिफः, नकबही, क्वालखु, झटापोल, क्वन्ति, क्वबहाः, स्वँथ, मंगलबजाः, हःखा, लुँहिति, ओकुबहाः, थैना, चक्रबही, हौगः, तिच्छुँगल्लि, इखालखु, वँला जुयाः पुञ्चलिइ वयाः क्वचाइगु खः ।