येँ/‘अग्रजयात सम्मान, अनुजयात प्रोत्साहन, न्हूप्रतिभाया म्हसीका,झीगु अभियान’ धयागु मू सः थ्वय्काः प्यक्वःगु मौलिक गण्डकी स्टार राष्ट्रिय अवार्ड, श्रष्टा सम्मान व सांस्कृतिक ज्याझ्वः २०८२ क्वचाल । उपमा सञ्चार प्रा. लि. व तेजनेपाल मल्टिमिडिया प्रा.लि.या मंकाः ग्वसालय् जूगुु उगु ज्याझ्वःया मूपाहां भौतिक पूर्वाधार तथा यातायात मन्त्री देवेन्द्र दाहालं झीगु नेपाः देय् धयागु सांस्कृतिक विविधतां जाःगुु देय् जूूगुलिं थनया पुलांगु संस्कृतित ल्यंकातयेगु सकलसिगुु दायित्व खः धकाः धासें समाज रूपान्तरणय् म्ये संगीतं मूवंगु भूूमिका म्हितीगु खँ धयादिल ।
उपमा सञ्चार प्रा.लि.या नायः आशा गौतमया सभापतित्वय् जूगु उगु ज्याझ्वलय् चलचित्र विकास बोर्डया नायः दिनेश डि.सि., तेजनेपाल मल्टिमिडियाया नायः सुमनकुमार श्रेष्ठ विशेष पाहांकथं झायादीगु खः । ज्याझ्वलय् वरिष्ठ कलाकार सविन बास्तोला, वरिष्ठ पत्रकार कृष्ण भट्टराई, वरिष्ठ गायक व संगीतकार थानेश्वर गौतम, वरिष्ठ लोकगायक व संगीतकार राजन भुजेल विश्वकर्मायात श्रष्टा सम्मानपाखें हंगु खः । अथे हे दर्शक सम्मानपाखें म्ये हालामि माण्डवी त्रिपाठी, लोक गायक कुलेन्द्र विश्वकर्मा, लोक गायिका देवी हमाल, सिनेम्याटोग्राफर नीरज कँडेल, गायक विनोद ढकाल, गायक दिपक चौलागाईं, कलाकार पन्हा अधिकारी, गायिका कविता राउत, गायक चेतम गोतामे, गायिका शोभा पाण्डे, गायिका सरला राउत, गायिका मनु थापा मगर, पत्रकार रिदेन महर्जन, सञ्चारकःमि निर्मल पौडेल, बिक्रम सुनार, ग्राफिक्स डिजाईनर, सम्पादक रमेशमान श्रेष्ठयात हंगु खः । ज्याझ्वः पिएन सापकोटां न्ह्याकादीगु खः ।
