येँ/येँ महानगरपालिका वडा ल्याः २४ या ग्वसालय् थीथी ख्यलं योगदान बियाः राष्ट्रिय व अन्तर्राष्ट्रिय ख्यलय् विशिष्ट म्हसीका दयेकेत ताःलाःपिं वडा दुनेया २५ म्ह प्रेरणादायी व्यक्तित्वपिन्त छगू ज्याझ्वःया दथुइ हन ।
वडा ल्याः २४ या वडा अध्यक्ष विनोदकुमार राजभण्डारीया सभापतित्वय् जूगु उगु हना ज्याझ्वलय् पूर्वराजदूत केदारभक्त श्रेष्ठ, अर्थविद् डा. दुर्गेशमान सिंह, वरिष्ठ प्रशासनिक व्यक्तित्व पशुपतिभक्त महर्जन, पूर्वजलश्रोत सचिव भुवनेशकुमार प्रधान, एफएनसिसिआईया पूर्वअध्यक्ष रविभक्त श्रेष्ठ, जनरल अर्थोपेडिक्स डा. दीपकमान सिंह, वरिष्ठ मुटुरोग विशेषज्ञ प्रा. डा. बलराम श्रेष्ठ, समाजसेवी इन्द्रमान सिंह सुवाल, उर्जाविद् ई. दिल्लीराज शाक्य, कलाकार नरेन्द्र कंसाकार, संकिपाकःमि गोपालकृष्ण महर्जन, म्ये हालामि संगीता शाक्य, समाजसेवी राजेन्द्रराम श्रेष्ठ, समाजसेवी शरदकृष्ण श्रेष्ठयात हंगु खः ।
अथे हे कासा ख्यलय् पारा ओलम्पिकय् तेक्वान्दो विधां कांस्य पदक त्याकूम्ह पलेशा गोवर्धन, टेबलटेनिसया पूर्वकप्तान कमल चित्रकार, वुद्धिचाल कासामि बद्रीलाल नेपाली, मिस्टर महानगरया निगूगु संस्करण त्याकूम्ह सगेन्द्र सिंह, कराँते प्रशिक्षक छोरी डंगोल, बक्सिङ कासामि प्रवीण तुलाधर, एथलेटिक्स कासामि रमेश शाक्य, मुवा थाई बक्सिङया राष्ट्रिय कासामि राजेश महर्जन, टेनिस कासामि नविता श्रेष्ठ, टेवलटेनिस प्रशिक्षक राकेश महर्जन, नेपाःया महिला क्रिकेट टिमया न्हापांम्ह कप्तान नीरा राजोपाध्यायात हंगु खः ।
ज्याझ्वलय् न्वंवासें वडाध्यक्ष राजभण्डारीं समाज व देया निंतिं योगदान यानादीपिं २४ वडा दुनेया व्यक्तित्वपिन्त हने खंगुलिं लसता प्वंकूसे वय्कःपिन्सं राष्ट्र व समाजयात यानादीगु योगदान न्हूगु पुस्ताया निंतिं शिक्षा व प्रेरणाया श्रोत खः धयादिल । ज्याझ्वलय् वडाया दुजःपिं सुनिता महर्जन, कृष्णमान डंगोल, रत्नाकर बज्राचार्यं पाहाँकथं आशन ग्रहण यानादीगु खः ।
