जिगु देय्या चायात
जिगु ल्हातिं म्हूचिनाः
जब जब जिं जिगु देय्यात कयाः
नुगः चकंक छपु
म्ये हालेत स्वये … ।
बाझः मिसाया गर्भं पिहांवःगु सिर्जनाया धुन थें
मरुभूमि दत्थुं न्ह्याइगु खुसिया
निष्प्राण गति थें
परन्तु
जितः जिगु हे म्येया धुनं
छाय् थें म्वाय् म्वाय् चुइकी … ।
द्यां द्यांया सिमानां कुनातःगु
थ्व फाँट फाँट बुँ
पःखाः पःखालं घेरे यानातःगु
थ्व अल्याख छेँ
जिं स्यू, थौं जिगु देय् अल्याख
लालपुर्जाय्
कुचा कुचा दयेधुंकूगु दु,
जिं स्यू थौं जिगु देय् असंख्य टुक्राय्
कित्ताकाट जुइधुंकूगु दु ।
उकिं
जिं हालेगु जिगु राष्ट्रिय म्ये
गन थौं जिगु देय्या म्ये जुइ
अरे ! अन ला गन जिगु देय्या खइ
सुयागुं लालपुर्जाया म्ये थ्वयाच्वंगु दु … ।
जि सुकुम्बासी
छम्ह अनाधिकृत थुवाः थःगु हे देय्या
न्हाय्कंदुने देय्या किचः
क्यनाः क्यनाः
जिं स्यू थौं सुनानं जिगु नुगलय् देय्या गर्व थनेत
स्वयाच्वंगु दु … !
भूगोलय् च्वंगु जिगु देय्यात
क्यनाः क्यनाः
जिं स्यू थौं जितः सुनानं
राष्ट्रियताया
मुस्या ग्यय्केत स्वयाच्वंगु दु … ।
•
