यल/ताम्रकार समाजया प्रचार प्रसार उपसमितिया ग्वसालय् च्वमि,व्यवसायीनापं समाजया निवर्तमान अध्यक्ष रवीन्द्रराज ताम्रकार ‘प्वाःस्याः’या सफू ‘संस्कृति, समाज व व्यवसाय’यात कयाः परिसम्वाद व सफू लःल्हायेगु ज्याझ्वः जुल । परिसम्वादय् साहित्यकार, समालोचक शाक्य सुरेन, ललितपुर उद्योग वाणिज्य संघया पूर्व अध्यक्ष अजरमान जोशी, कवि श्याम तमोट व समाजया पूर्व अध्यक्ष अच्युतकृष्ण ताम्रकारं सफूया बारे थःथःगु नुगःखँ तयादीगु खःसा पत्रकार सुनील महर्जनं सहजीकरण यानादीगु खः । परिसम्वादय् वक्तापिन्सं थुगु सफुतिइ यलया संस्कृति, इतिहास, अर्थ, ताम्रकार जाति, समाज व व्यवसायया बारे महत्वपूर्ण च्वसु व खँल्हाबल्हा दुथ्याःगु छगू दस्तावेज जूगुलिं थुगु सफू पाठक व न्हूपुस्ताया निंतिं महत्वपूर्ण जूगु खँ धयादिल ।
समाजया अध्यक्ष विनोद ताम्रकारया सभापतित्वय् जूगु उगु ज्याझ्वलय् च्वमि ताम्रकारं सफूया थीथी पक्षया बारे न्वंवानादीगु खःसा वय्कलं समाजयात १०० प्रति सफू लःल्हानादीगु खः । प्रचार प्रसार उपसमितिया संयोजक मनोज ताम्रकारं सुभाय् न्वचु बियादीगु उगु ज्याझ्वः समाजया कार्यसमितिया दुजः प्रवल ताम्रकारं न्ह्याकादीगु खः ।
