येँ/येँ महानगरपालिका वडा ल्याः १८ या ग्वसालय् तपिंतां पार्कय् तःगु येँ महानगरपालिकाया संस्थापक प्रमुख (न्हापांम्ह प्रमुख) पी.एल. (प्रेमलाल) सिंहया शालिकया उलेज्या छगू ज्याझ्वःया दथुइ महानगरया कार्यवाहक प्रमुख सुनिता डंगोलं यानादिल । वडा ल्याः १८ या वडा अध्यक्ष न्हु्च्छेकाजी महर्जनया सभापतित्वय् जूगु उगु ज्याझ्वलय् वडा ल्याः ११ या वडा अध्यक्ष हिरालाल तण्डुकार लगायतया पाहांपिन्सं मदुम्ह सिंहया योगदानया बारे न्वंवानादीगु खः । मूर्तिकार श्याम तुलाधरं दय्कादीगु उगु शालिक ९ लाख ३८ हजारया लागतय् निर्माण जूगु खः ।
२०४९ सालया स्थानीय निर्वाचनं येँ नगरपालिकाया प्रमुखय् निर्वाचित जुयादीम्ह सिंहं २०५२ साल मंसिर २९ गते महानगरपालिका घोषणा यानाः महानगरपालिकाया न्हापांम्ह प्रमुख जुयादीगु खः । साविक स्थानीय निकाययात ‘निर्णय यायेगु’ व ‘निर्णय कार्यान्वयन यायेगु’ अधिकार बीकेगुलिइ सिंहया तःधंगु योगदान दु । वय्कः २०८१ पुस १ गते मदुगु खः ।
