येँ/येँया मखनय् च्वंगु तानादेवी (तारिणी भवानी) देगः स्थापना जूगु १२सय दँ क्यंगु लसताय् जूगु बुसादँ ज्याझ्वःया दथुइ भुुवनलाल श्रेष्ठं च्वयादीगु ‘श्री तानादेवी (तारिणी भवानी)’ सफू ज्याझ्वःया मूपाहां बागमती प्रदेश सभाया दुजः हरिप्रभा खड्गी श्रेष्ठं विमोचन यानादिल । कान्तिपुरया जुजु भास्कर मल्लया चौतरिया झगल थकुलं थःपिनिगु इष्टद्यःयात द्यःछेँ दय्काः देछाःगु खः । उकिं तानादेवी थकुलपिनिगु इष्टद्यः नं खः । म्हपूजाखुन्हु थन पूजा यायेधुंकाः जक थःगु छेँय् म्हपूजा यायेगु थकुलतय्गु परम्परा दु ।
श्री तानादेवी (तारिणी भवानी) संरक्षण समितिया ग्वसालय् जूगु उगु ज्याझ्वलय् ५४ म्ह ज्येष्ठ नागरिक थकुलपिन्त नगदसहित मूपाहां श्रेष्ठं स्वांमाः क्वखाय्काः हंगु खः । नुगःखँ तयेगु झ्वलय् वय्कलं थुकथं धार्मिक सांस्कृतिक ज्याया संरक्षण यानाः धार्मिक संस्थां ज्येष्ठ नागरिकपिन्त हनेगु धइगु पुण्यया ज्या खः, उकिं झीगु संस्कृति सम्पदा म्वाकातयेगु निंतिं थःम्हं फुगुचाःगु ग्वाहालि यायेगु खँ वय्कलं धयादिल । अथे हे समितिया अध्यक्ष भुुवनलाल श्रेष्ठं धार्मिक गतिविधि व जातीय संग्रहालय चाय्केत स्वयाबलय् स्थानीय निकायपाखें थीथी बाधा अवरोध बियाच्वंगु व गुथि जग्गा नं न्हनाःवनाच्वंगु खँय् दुःख प्वंकादिसें थुकियात सम्वन्धित निकायं ध्यान बीमाःगु खँय् बःबियादिल । नापं विगत १२ दँ न्ह्यःनिसें हरेक बिहीबार सन्ध्याकालीन आरती व भजनयात निरन्तरता बियाच्वनागु व भक्तजनपिनिगु सहभागिता अप्वयावंगु खँय् अध्यक्ष श्रेष्ठं लसता प्वंकादिल ।
सुथय् वेद पाठ व हवन ज्या क्वचायेधुंकाः समेबजि देगःया मूलुखाय् तयाः पूजा याःगु खः । थुकथं बुसादँया इलय् देगःया गजुरय् न्हूगु झन्डोत्तोलन यायेगु नापं योमरिं लुइगु ज्या नं जूगु खः ।
