ख्वप/याताजः (नेपाल भाषा साहित्य दबू) या ग्वसालय् ख्वपय् जूगु छगू ज्याझ्वःया दथुइ प्यक्वःगु श्याम–विश्व सिरपा चिबाखं च्वमि नरेश अमात्ययात मूपाहाँ नेपालभाषा एकेडेमीया भाइस चान्सलर डा. पुष्पराज राजकर्णिकारं दसिपौ व सिरपादाता श्याम आशां नगद २५, ५५५ /– तका लःल्हात ।
श्याम आशा व विश्व कायष्थं पलिस्था याःगु थुगु सिरपा दच्छियंक पिहांवःगु नेपालभाषाया चिबाखं सफू मध्ये सर्वोकृष्ट सफूयात लःल्हाना वयाच्वंगुलि थुगुसी नरेश अमात्यया स्वां चिबाखं सफूयात ल्यःगु खः ।
याताजःया नायः विमल ताम्राकारया सभापतित्वय् जूगु उगु ज्याझ्वलय् पाहाँपिं वरिष्ठ कवि योगेन्द्र प्रधान, समीक्षक पूर्ण ताम्राकार लगायतं चिबाखं साहित्यया बारे नुगखँ तयादीगु खः ।
शकुन्तला महर्जनं न्ह्याकादीगु उगु ज्याझ्वलय् सुरेन्द्रलाल भुजूं च्वयादीगु चिबाखं मुना सफू मनूत छेँय् लिहां वयाच्वन नं विमोचन जूगु खः ।
