येँ/नेपाल ट्रायथलन संघया गुक्वःगु दँमुंज्या जुल । संघया अध्यक्ष निलेन्द्रराज श्रेष्ठया अध्यक्षताय् जूगु उगु दँमुंज्याय् संस्थाया मानार्थ अध्यक्ष गणेशमान पुन मूपाहाँ व संस्थापक अध्यक्ष विश्वशंकर पालिखे विशेष पाहाँकथं झायादीगु खः ।
संघया अध्यक्ष श्रेष्ठं झिक्वःगु राष्ट्रिय खेलकुदय् व एसियाली खेलकुदय् नं ट्रायथलनयात दुमथ्यकुगुलिं दुःख व्यक्त यासें जापानया आइची नागोयाय् जुइगु एसियाली खेलकुदय् ट्रायथलन टेक्निकल अफिसरया रुपय् चाहना शाह व पुष्परत्न वज्राचार्यं जक ब्वतिकाइगु खँ धयादिल । अध्यक्ष श्रेष्ठं सुर्खेतय् जुइगु राष्ट्रिय खेलकुदय् धाःसा ट्रायथलनयात ‘लेट’ इन्ट्री बिइकेगु कुतः जुयाच्वंगु धयादिल । वय्कलं धयादिल – थ्व स्वयां न्ह्यःया राष्ट्रिय खेलकुदय् ट्रायथलन न्ह्याबलें दुथ्यानाच्वंगु तर आः जुइत्यंगु राष्ट्रिय खेलकुदय् प्राविधिक कारण धयाः ट्रायथलनयात दुमथ्याकुबलय् तसकं दुःख लगेजूगु दु अय्नं जिपिं सम्बन्धित पक्षनापं सहलह यानाच्वनागु दु । सरोकारवालापिं ट्रायथलनयात राष्ट्रिय खेलकुदय् दुथ्याकेगु खँय् सकारात्मक जू् । दँमुंज्याय् विश्व ट्रायथलन संघया अध्यक्ष एन्टोनियो एरिमानीं भिडियो सन्देशपाखें भिंतुना ब्यूसें आकाझाकां वःगु बाढिपहरोया प्रकोपय् नेपाः दे लाःगुलिं सहानुभूति व्यक्त यासें विश्व ट्रायथलन संघ थुगु दुःखद् घडीइ नेपाःया साथ दु धकाः एक्यवद्धता प्वंकादिल ।
ज्याझ्वलय् ट्रायथलन संघया महासचिव युवराज सुनारं वार्षिक ज्याझ्वः व योजनाया बारे व संघया कोषाध्यक्ष निरज श्रेष्ठं आर्थिक प्रतिवेदन न्हयव्वयादीगु खः ।
