दकले न्हापां थःगु म्हसीका गुकथं बियादी ?
बाः तेजलाल महर्जन व मां श्रीमाया महर्जनया कोखं जिगु जन्म यल महानगरपालिका वडा नं. ७ दुपाट त्वालय् जूगु खः । जिमि न्याम्ह दाजुकिजापिं दु । उकीमध्यय् छम्ह मदयेधुंकल । परिवारय् जिगु जहान व निम्ह काय्, निम्ह भौपिं दु ।
नेपाली कांग्रेस प्रतिवन्धित जूगु अवस्थाय् जगतराज शाक्यया पहलं ओमकारप्रसाद श्रेष्ठं जितः नेपाली कांग्रेस पार्टीया सदस्य दय्कूगु जुल । अले ७ नं. वडाया एकाइ गठन यानागु झ्वलय् उकिया अध्यक्ष जितः ल्यल । एकाई अध्यक्ष अले २०४७ सालय् जिल्ला सदस्यय् दः ओमकार दाईनं नियुक्त यानादिल । २०४८ सालय् ८ क्वःगु महाअधिवेशन जूबलय्निसें दथुइ छकः क्षेत्रीय सभापति जुया, नत्र महासमितिइ थौंतक निरन्तर नेपाली कांग्रेसय् दुथ्यानाच्वंगु
जुल । थुगुसी वयाः नेपाली कांग्रेसं प्रतिनिधि सभाया निर्वाचनय् यल क्षेत्र नं. २ पाखें जितः उम्मेदवार दय्कूगु जुल । थुकिया हे दौरानय् जि जनताया दथुइ वनाच्वनागु दु ।
जेनजी आन्दोलनया लिच्वःकथं फागुन २१ गते प्रतिनिधि सभाया निर्वाचन जुइत्यंगु दु । थुकियात छिसं गुकथं कयादी ?
जेनजी आन्दोलनय् नैतिक समर्थन जिगु नं दु । उगु इलय् सामाजिक संजाल व्यवस्थित यायेगु खँ पाय्छि खः, तर बन्द हे यानाबिल । सामाजिक संजाल धइगु थौंकन्हे मचांनिसें कयाः उच्च, निम्नवर्गीय हरेक मनूतय्संतकं चलेयानाच्वंगु अवस्था जुल । थौंया इलय् थ्व आवश्यकताया विषय जुइधुंकल । थुकियात कटौती याःबलय् उकियानापं सुशासन व भ्रष्टाचार अन्त्यया खँ नं वल । गुगु खँ जिमिसं नं नेपाली कांग्रेस दुने च्वनाः उठेयानाच्वनागु जुल । उकिं थ्व मुद्दाय् जिमिगु समर्थन दुगु हे जुल । जेनजीया छगू माग नेता व नेतृत्व याइपिनि मस्त ७÷८ सय वंगु कफी त्वनीगु अले जिपिं सामान्य मस्तय्सं २० रुपैंया तकया चिया छगू त्वनेमफु । थ्व विभेदया विरोध याःगु तसकं सही खँ खः । मेगु न्हापांनिसें नेतृत्व कयाच्वंपिन्सं हे आःतक नं नेतृत्व कया हे च्वन तिनि । थ्व चेञ्ज जुइमाल धइगु जेनजी आन्दोलनलिपा जोडे जुयावःगु मुद्दा जुल । थ्व खँ जिमिसं थुइकाः, नेपाली कांग्रेसं थुइकाः वंगु विशेष महाअधिवेशनपाखें जेनजीया मागया हे सम्बोधनया निंतिं गगनकुमार थापायात सभापतिइ हयागु जुल ।
छि यल क्षेत्र नं. २ लय् प्रतिनिधि सभाया सदस्यया निंतिं उम्मेदवार जुयादीगु दु, छिकपिनिगु मुख्य एजेण्डा छु छु खः ?
मुख्य एजेण्डा धइगु न्हूगु जेनरेशनया मागयात सम्बोधन यायेगु हे खः । म्हिगःया गुलि नं बेथितित दु उकियात सुधार यानाः यंकेगु खः । गुलि नं संवैधानिक निकायलय् थःगु खल्तीं लिकयाः नियुक्ति यानाच्वन धइगु पुलांगु पार्टीयात वयाच्वंगु गुगु आरोप खः, वयात सुधार यानाः सम्बन्धित विज्ञतय्त हे नियुक्ति यायेगु, चाहे व पार्टीया छाय् मजुइमा चाहे स्वतन्त्र व्यक्ति छाय् मजुइमा सम्बन्धित ज्याय् सम्बन्धित व्यक्ति हे नियुक्ति यायेगु घोषणा यानाः न्ह्यांवनाच्वनागु दु ।
यल नगर धइगु हस्तकलाया नगर खः । थन गुलि नं हस्तकलाया ज्वलंत उत्पादन जुयाच्वंगु दु उकियात बिचौलियापिन्त हटेयानाः तप्यंक एक्सपोर्ट यायेगु ताकि उकिं वइगु ध्यबा तप्यंक उत्पादन याःपिनिगु ल्हातिइ लाइगु वातावरण दय्काः वनेगु संकल्पया रुपय् न्ह्यांवनाच्वनागु जुल । मेगु थन बुंगद्यःया जात्रानिसें मेगु थीथी जात्रात यक्व दु । उकी पर्यटकत गुकथं दुकायेगु धइगु खँय् बुंगद्यः सालेगु इलय् वइपिं पर्यटकतय्त द्यः साय्केबीगु, अले इमित दच्छिइ छकः नेपाःया यलय् वनाः बुंगद्यः साः वनेनु धइगु सोच विकास याकेगु, गुकिं यानाः जात्रा स्वःवनेगु निंतिं हे टुरिष्टत थन वयेगु वातावरण दय्केगु पहल यायेमाः धइगु नं झीगु एजेण्डा खः । अथे हे एयरपोर्टं यक्व सत्तीगु थाय् खः बालकुमारी नापंच्वंगु सप्तखेल । थुकियात यल महानगरपालिकां टुरिष्ट बसपार्क दय्केगु धकाः दय्कातःगु योजना अलपत्र लानाच्वंगु दु । तर थुगुसी न्ह्याथे यानाः सां बसपार्कया रुपय् दय्काः अनंनिसें पदयात्राया लँपु दय्काः नगर दुने पर्यटकतय्त चाःहिकेगु योजना नं दु ।
लामातारनिसें सुरुङ मार्ग दय्केगु जिगु छगू गौरवमय योजनाय् लाकागु दु । सिस्नेरी लाकुरी भञ्ज्याङ जुयाः मानेदोभान स्वाइगु सुरुङ मार्गया सम्भाव्यता अध्ययन यानाः थुकियात पूवंकेत माःगुकथं ज्या न्ह्याकेगु । थ्व मार्ग काभ्रेया पनौति जुयाः वि.पी. राजमार्गनापं स्वाइगु वैकल्पिक राजमार्गया रुपय् स्थापित जुइगु खः । अथे हे महालक्ष्मी नगर क्षेत्रय् विशेष यानाः इमाडोल लागाय् लःया समस्या जुयाच्वंगुयात मेलम्ची लःया वितरण यायेगु व्यवस्था मिलेयायेगु । थुकिया निंतिं अखुन्ह तिनि मेलम्ची लःया बारे जिमिसं अन स्वापू तयाबलय् नेपाल सरकारपाखें दक्व ज्या जुयाच्वंगु दु । खानेपानी वितरण जुइगु करीब करीब दक्व तयारी जुइधुंकल । आः थुकियात बजेट छुटेयानाः टेन्डरय् वन धाःसा ज्या न्ह्याइ, धइगु लिसः वल । थुकिं समस्या समाधान जुल धाःसा बां हे लात यदि समस्या वल धाःसा विकल्पया रुपय् नं सुरुङ मार्गं लः हयेगु नं योजना दु ।
लुभु कापःया निंतिं प्रख्यातगु थाय् जुयाः कापः उद्योगया हबया रुपय् स्थापित यायेगु । अनं उत्पादन जूगु हाइक्वालिटी प्रोडक्सनयात एक्सपोर्ट यायेगु, मेगु महालक्ष्मी नगरपालिकालिसे समन्वय यानाः गुलि नं अनया सरकारी कार्यालय, कलेज, स्कुलत दु अन दक्व अनं उत्पादन जूगु कापःयात हे युज याकेमाः धइगु खँय् न्ह्यांवनेगु नं एजेण्डाय् लाः । मेगु गोदावरी खोला करिडोर, कोङ्खु खोला करिडोर, मनोहरा करिडोर, बागमती करिडोर, फेदीखोला करिडोरयात व्यवस्थित यायेगु ।
घरदैलो कार्यक्रमया दौरानय् गज्याःगु प्रतिक्रियात वयाच्वंगु दु ?
जि थन हे जन्म जूम्ह जुल । उकिं थनया जःखः हे ज्या यानाच्वनागु जुल । थ्व थाय्या हरेक विषयवस्तु थःम्हं थूगु स्यूगु नं जुल । जिं न्हापांनिसें हरेक इलय् जनतालिसे जोडेजुयाः ज्या यानाच्वनागु जुल । थुकिं यानाः मतदातापिनिगु रेस्पोन्स अतिकं बांलाःगु रुपय् वयाच्वंगु दु । थुगुसी छि हे दंगु जुल, आः छितः हे भोट बियाः त्याकेगु जुल, धकाः बचं दक्व थासं वयाच्वंगु दु । वय्कःपिनिगु समस्यात नं कनाच्वंगु दु । आशा भरोसा नं यक्व यानाच्वंगु दु । समग्रय् घरदैलो कार्यक्रम बांलाक हे न्ह्यानाच्वंगु दु ।
न्हूगु दलया उम्मेदवारपाखें छितः गुलितक चुनौति खंकादिया ?
न्हूगु दल जक मखु पुलांगु दलया उम्मेदवार नं दु । तर जितः खासै छुं असर जू थें मच्वं । स्वाभाविक रुपं वय्कःपिं नं उम्मेदवार जुयादीगु जुल । तर यल क्षेत्र नं. २ लय् थुकिया असर जुइ थें मखना ।
नेपाली कांग्रेसं थुगुसी विशेषतः स्वनिगलय् तसकं म्हो जक नेवाः उम्मेदवारत ल्यःगु दु, थुकी छिगु बिचाः छु दु ?
थ्व खँय् जिं न्ह्याथाय् वनाः नं धयाच्वनागु दु, मुद्दा उठे यानाच्वनागु दु । येँया खँल्हायेबलय् अनं न्ह्यागु पार्टीं त्याःसां ८ नं. क्षेत्र छगू जक सुरक्षित खनेदु । स्वनिगः नेवाःतय्गु धकाः धायेगु, नेवाःत धकाः कःघानाच्वनेगु तर उकिया महसुस आः सुनानं याना महल नि । येँया १० गू क्षेत्रय् ९ गू ला पिहांवनीगु अवस्था वयेधुंकल । अय्नं उकीमध्यय् नं स्थायी वासीपिन्त ल्ययाच्वंगुलिं भतिचा कम चिन्ताया विषय जुल । उकिं आः नेवाःतय्सं भचा अप्वः बिचाः यायेमाःगु ई वयेधुंकल । मेगु, नेवाःतय् दथुइ एकता मजूगु नं यक्व खनेदत । नेवाःत भचा नेतृत्वय् वनेगुलिइ ल्यूने लानाच्वंगु जिं महसुस याना । यलया ३ नं. क्षेत्रया खँ ल्हायेबलय् वहे हालत, पिनेपिनेयापिं जक त्यानाच्वन । अनं थीथी पार्टीइ ज्या यानाच्वंपिं सक्षमपिं नेवाःत यक्व दु । वय्कःपिन्सं व थाय् त्वःतेमज्यू । थ्व झीगु धरातल त्वःतेमज्यू धइगु मुद्दा जिं ल्ह्वनाच्वनागु दु, पार्टीदुने नं तयाच्वनागु दु । सामुहिक रुपं नं धयाच्वनागु दु ।
नेवाःत व नेपालभाषा थपूया निंतिं छिगु छु योजना दु ?
जि नेपालभाषा मंकाः खलः यलया सल्लाहकार नं जुल । थौं झी थथे स्वतन्त्र रुपं न्वंवायेगु च्वयेगु अधिकार कायेगुलिइ तःधंगु योगदान मंकाः खलःया दु । नेपाःया प्रजातान्त्रिक आन्दोलननिसें नेपालभाषा, साहित्यया विकास यायेगुलिइ मंकाः खलःया तःधंगु योगदान दु । व इलय् याःगु संघर्षया परिणाम झी थौं थनतक थ्यंगु जुल । खला बागमती प्रदेशपाखें नं नेवाः भाय्या निंतिं छुं छुं अधिकार बी हे धुंकल । गुकिं यानाः आः सरकारी निकायलय् नेपालभाषा छ्यलेफइगु जुइधुंकल ।
विशेष यानाः नेवाःतय्गु नसात्वँसा, तिसा, वसः, जात्रापर्व, संस्कृति, सम्पदा, देगः, बहाःबही, फल्चा दक्वदक्व झी पुर्खां दय्कातःगु स्वयेगु निंतिं हे टुरिष्टत थन वइगु खः । थुकिया संरक्षण सम्वद्र्धनया निंतिं जि न्हापांनिसें हे लगेजुयाच्वनागु दु अले भाषाया ख्यलय् नं न्हापांनिसें सनाच्वनागु ल्याखं थुकियात निरन्तरता जिगुपाखें न्ह्याबलें दया हे च्वनि ।
नेपाली कांग्रेस न्हूगु नेतृत्वय् व थुगु निर्वाचनय् गठवन्धन मयाःसे वनेगु धाःगु दु, थुकिया परिणाम गज्याःगु वइ थें च्वं ?
गगनकुमार थापायात जिमिसं नेपाली कांग्रेसया सभापति याना, थुकिं छगू माहौल तयार जुल । अले हाकनं गगनया हे नेतृत्वय् वय्कःयात प्रधानमन्त्री दय्काः सरकार चलेयायेगु धकाः न्ह्यांवनाबलय् देय्न्यंक मेगु माहौल बनेजूगु दु । अझ जि यलय् जूगु नातां यलया १,२,३ नं. क्षेत्रय् स्वयाच्वना । थनया माहौल तसकं हे बांलाः । १२ दँलिपा खुसि लिहांवइ धाःथें न्हापा थें थुगुसी नं थ्व स्वंगू क्षेत्रं कांग्रेसया पक्षय् वइ । अले देय्न्यंक नं खँ जुइबलय् व रिपोर्ट स्वयेबलय् बांलाः बांलाः धइगु हे खँ वयाच्वंगु ल्याखं थुगुसी नेपाली कांग्रेसया बहुमत वइ ।
दकलय्लिपा छितः भोट बियादीपिन्त छिसं छु प्रतिवद्धता प्वंकादी ?
यल क्षेत्र नं. २ या सकलें मतदाततय्त का, मखुम्हेसित हे भोट बीलात, खराबम्ह हे लात, म्हिगः थज्याःम्ह हे जुल धायेगु मौका जिं बी हे मखु । अले मेगु थनया गुलि नं मतदाता जक मखु थौं भोट बीमखंसां लिपाया चुनावय् भोट बीगु पाः वइपिं २ नं. क्षेत्रया दक्व वासीपिनिगु छ्यं क्वछुइमायेक जिं छुं हे ज्या यायेमखु । थ्वहे जिगु प्रतिवद्धता जुल । ड्ड
