यल/पर्यटकपिनिगु निंतिं च्वनेगु थाय्, नखःचखः व सांस्कृतिक जानकारी बीगु उद्देश्यं ‘पाटन स्टे डक कम’ वेबसाइट सञ्चालनय् वःगु दु । पाटन स्टे एसोसिएसनं स्वन्ति नखः, नेपाल संवत् ११४६ न्हूदँ व छठ पर्वया लसताय् भिंतुना कालबिल ज्याझ्वःया ग्वसाः ग्वयाः थ्व खँया जानकारी ब्यूगु खः ।
ज्याझ्वलय् पाटन स्टे एसोसिएशनया अध्यक्ष नापं नेवारी होम्स अपार्टमेन्टया संचालक प्रकाश राजभण्डारीं एसोसिएशन मार्फत् पर्यटकपिन्त लक्षित यानाः इमित च्वनेगु थाय् व सञ्चालकपिनिगु विशेष परिचय, नखःचखः, पर्यटन सुचंसहित पाटन स्टे डट कम डिजिटल सेवा वेबसाइट सञ्चालनय् हयागु खँ धयादिल । वय्कलं पाटन स्टे एसोसिएशनया उद्देश्य व कार्यनीतिबारे न्ह्यथनाः यलय् सम्पदा होमस्टे, गेष्ट हाउस, होटल, अपार्टमेन्टत थौंकन्हे सच्छि स्वयां अप्वः दुगु व उकीमध्ये अप्वः धइथें होमस्टे व्यवसाय दर्ता मयासे संचालन जुयाच्वंगुलिं थुकिं यानाः पर्यटकपिन्त बांमलाःगु प्रभाव लानाच्वंगु जुयाः स्थानीय निकायं अनुगमन यायेमाःगु खँ धयादिल । भविष्यय् पर्यटकपिन्त वेबसाइट, एनिमेशन, डकुमेन्ट्री, सामाजिक सञ्जाल मार्फत् यलया जानकारी ब्युब्युं वनेगु योजना नं दुगु खँ कनादिल । पाटन स्टें तालिम व बजारमुखी रणनीतियात बांलाक अवलम्बन यानाः भविष्यय् न्हिं करिब २००० पर्यटकयात माःगु थाय्या व्यवस्था यायेफःसा स्थानीय समुदायलय् रोजगारी सिर्जना व आर्थिक लाभ जुइ । जिमिसं एकल पर्यटक, प्याकेज टुर पर्यटक, सांस्कृतिक व धार्मिक पर्यटक, कृषि पर्यटकयानापं उच्च ओहोदाया सम्मानित व्यक्तित्वपिन्त बांलाक थाय्या व्यवस्था यायेफःसा पर्यटनया माध्यमं आर्थिक समृद्धि हासिल यानाः विश्वया हे प्रमुख गन्तव्य दय्केफइगु क्षमता दुगु खँ धयादिल ।
ज्याझ्वलय् यल महानगरपालिकाया उद्योग पर्यटन, संस्कृति संरक्षण कमिटीया दुजः नापं वडा ल्याः ६ या वडाअध्यक्ष रुपेन्द्रराज शाक्यं यलय् होमस्टे, बिएण्डबि गेष्ट हाउसयात व्यवस्थित यानाः पर्यटन विकासय् पाटन स्टे एसोसिएशननापं सहकार्य यानाः यलय् पर्यटकपिनिगु च्वनेगु ई अप्वय्केगु व व्यवस्थित होमस्टे न्ह्याकेमाःगु खँय् बःबियादिल । अथे हे पाटन पर्यटन विकास संगठनया अध्यक्ष दिलेन्द्रराज श्रेष्ठं यल वइपिं पर्यटकया ल्याः अप्वय्केगु व च्वनेगु ई ताःहाकय्केमाःगु खँय् बःब्युसे नेपालय् वइपिं पर्यटकपिनिगु ल्याखय् १० प्रतिशतया हाराहारीइ जक पर्यटकत यलय् वइगु खँ धयादिल । उकिं यलय् होमस्टेया ल्याः व न्हि गुलितक ल्याखय् पर्यटकत च्वनेगु थाय् उपलब्ध यायेगु धइगु योजना दय्केत डाटा आवस्यक जूगु खँ धासें आः एशोसियशन मार्फत् अनुसन्धान याये माःगु खँ धयादिल । यलया पर्यटकनापं काःगु प्रवेश शुल्कया २५ प्रतिशत (दँय् करिब ४.५ करोड ध्यबा) बराबर जुइगु रकमया कोष स्थापना यानाः यलय् पर्यटन व सम्पदा संरक्षण यायेफइगु सल्लाह ब्युसें वय्कलं यलय् पर्यटनया दीर्घकालीन योजना दय्केत व प्रभावकारी नीति हयेत महानगरं ललितपुर (पाटन) पर्यटन बोर्ड नीस्वनेगु आवश्यक जूगु खँ धयादिल ।
ज्याझ्वलय् १६ वडाया अध्यक्ष निर्मलरत्न शाक्यं स्थानीय तह स्थानीय सरकारपाखें नं सहकार्य यानाः वनेमाःगु खँय् बःब्युसें यलय् दुगु होमेस्टेया अवस्था व सुधार यायेमाःगु खँया पहिचान यानाः वर्कशपया ज्याझ्वः यायेमाःगु व उगु ज्याझ्वलं यलय् पर्यटन विकासया निंतिं दीर्घकालीन योजना दय्केगुलिइ ग्वाहालि जुइगु खँ धयादिल । पाटन संग्र्रहालयया सूचना अधिकृत सुरेशमान लाखेनं यलय् पर्यटन धायेवं हे सांस्कृतिक पर्यटन हे खः । पाटन स्टे वेबसाइट मार्फत् पर्यटन प्रवद्र्धनया ज्या यायेत्यंगु खँ तसकं च्वछायेबहःजू । डिजिटल प्रविधिया माध्यमं हे यलया इतिहास, संस्कृति व सम्पदाया जानकारी पर्यटकतय्त थ्यंकेफःसा यल इमिगु निंतिं न्हूगु गन्तव्य जुइगु खँ धयादिल ।
नुगःखँ तयेगु झ्वलय् क्याफे डी पाटनया संचालक नापं पाटन पर्यटन विकास संगठनया पूर्व अध्यक्ष गुणमुनी शाक्यं छम्ह जर्मन गेष्टया इनापय् थःम्हं गेष्ट हाउस व्यवसाय न्ह्याकागु खँ धासें क्याफे डी पाटन रेस्टुरेन्ट व्यवसाय करिब ४० दँ न्ह्यःनिसें न्ह्याकावयाच्वनागु खँ नं धयादिल । अथे हे ललित हेरिटेज होम्सया संचालक नापं ज्यापु समाजया अध्यक्ष सन्तमान महर्जनं थः जन्मेजूगु छेँ नं मंगलबजार दरबार क्षेत्र नापंलाःगुलिं जहाननापं सल्लाह यानाः १२ दँ न्ह्यःनिसेें व्यवसाय न्ह्याकावयाच्वनागु खँ न्ह्यथँसे झी स्थानीय बासिन्दा जूगु नातां झी छधीछप्पँ जुयाः न्ह्यांवनेमाःगु खँय् बःबियादिल । तःजाःफः द हेरिटेज होमया संचालक नापं नेपाल घरेलु तथा साना उद्योग महासंघ, ललितपुर शाखाया अध्यक्ष शैलेन्द्र श्रेष्ठं यलय् सम्पदा स्वयेत वइपिं पर्यटक बाहेक कन्भेन्सनय् वइपिं पर्यटकयात नं व्यापार प्रवद्र्धन याये माःगु खँय् बःबियादिल । सुलिम्ह दरबारया संचालक मंगलकृष्ण श्रेष्ठं पर्यटन पूर्वाधारया योजनाया आवश्यकता जूगु खँ न्ह्यथँसें पाटन स्टे एसो सिएशनं स्थानीय निकायनापं मिलेजुयाः ज्या यायेमाःगु खँय् बःबियादिल ।
ज्याझ्वः पिस एण्ड जोए गेष्ट हाउसया संचालक व सचिव आपुलाल अवालें न्ह्याकादीगु खःसा वय्कलं पाटन स्टे एसोसिएशनं स्थानीय निकाय व पर्यटन संस्थातनापं सहकार्य यासें यलय् पर्यटन विकास यायेमाःगु खँ धयादीगु खःसा टेम्पल हाउसया संचालक व उपाध्यक्ष सत्यरत्न शाक्यं दकले न्हापां व्यवसायीपिनिगु दथुइ थुकथं ज्याझ्वः यायेखंगुलिं लसता प्वंकुसें ज्याझ्वलय् झायादीपिं पाहांपिं, दुजःपिं व होटल गुडविलया संचालक अनिल शाक्यनापं ग्वाहालि यानादीपिं सकसितं सुभाय् देछानादिल ।
