यल, ललितपुर पब्लिकेशन प्रा. लि.या पिथना न्हू प्रेष्टिज नेपाः राष्ट्रिय लय्पौ २२ दँ क्यंगु लसताय् २२ क्वःगु वार्षिकोत्सव व हना ज्याझ्वः अशोक हलय् छगू ज्याझ्वःया दथुइ मूपाहाँ यल महानगरपालिकाया प्रमुख चिरीबाबु महर्जनं उलेज्या यानादिल । नुगः खँ तयेगु झ्वलय् मूपाहां महर्जनं पत्रिका निरन्तर पिदनाः २२ दँ थ्यंगु नेवाः ख्यलय् हे छगू दसू जूगु दु, यल नगरं पिहांवयाः स्वनिगः न्यंक व स्वनिगः पिने थीथी जिल्लाय् थ्यंकेफुगु व स्तरीय लेख रचना पिकयाः ब्वमिपिनिगु नुगः त्याकेफुगु यलवासीपिं नापं सकल नेवाःतय्गु गौरवया खँ खः धासें पत्रिका निरन्तर व अझ स्तरीयरुपं पिकायेगु अले ईकथं अनलाइनय् नं न्ह्यांवनेमाःगु दु, गुकियात यल महानगरपालिकां नुगः क्वसाय्काः ग्वाहालि यायेगु जुइ धकाः धयादिल ।
पब्लिकेशनया अध्यक्ष यज्ञरत्न धाख्वाया सभापतित्वय् जूगु उगु ज्याझ्वलय् क्रोधकला शिरोमणि प्राज्ञ कालु कुम्हाः व नेपालभाषा एकेडेमीया चान्सलर मल्ल के. सुन्दर विशेष पाहांकथं झायादीगु खः । न्हू प्रेष्टिज नेपाःया सम्पादक नरेन्द्रबहादुर राजभण्डारीं लसकुस न्वचू बियादीगु उगु ज्याझ्वलय् वरिष्ठ पत्रकार प्रेमनाथ जोशी, पत्रिकाया सल्लाहकार प्रा. नर्मदेश्वर प्रधान, अनुवादक अणुराज जोशी, यल मनपा वडा ल्याः १६या अध्यक्ष निर्मलरत्न शाक्य, प्रा. लि. या संचालक सुमनरत्न धाख्वा, दुजःपिं विष्णुरत्न शाक्य, रामकृष्ण बाराहीं पाहांकथं आसन ग्रहण यानादीगु खः ।
पत्रिकाया कार्यकारी सम्पादक नरेन्द्र श्रेष्ठं न्ह्याकादीगु उगु ज्याझ्वलय् पत्रिकायात निरन्तर ग्वहालि यानादीपिं च्वमि, विज्ञापनदाता व ग्वाहालिमिपिं २२ म्हेसित हंगु खः । ज्याझ्वलय् प्रा. लि.या संचालक सुमनरत्न धाख्वानं सुभाय् न्वचूनापं सभा क्वचाय्कादीगु खः ।
