यल/नेपालभाषा मंकाः खलः यलया १४ क्वःगु तःमुँज्या छगू ज्याझ्वःया दथुइ मूपाहाँ वरिष्ठ साहित्यकार यज्ञरत्न धाख्वानं उलेज्या यानादिल । मंकाः खलःया नायः हिराकाजी महर्जनया सभापतित्वय् जूगु उगु ज्याझ्वलय् यल महानगरपालिकाया प्रमुख चिरीबाबु महर्जन, १६ नम्बर वडाया अध्यक्ष निर्मलरत्न शाक्य, मंकाः खलःया पुलांम्ह नायः डा. पुष्पराज राजकर्णिकार, विराट नेपालभाषा साहित्य सम्मेलन गुथिया नायः महेन्द्रगोपाल कर्माचार्य लगायतया पाहाँपिन्सं मंकाः खलकं नेपालभाषा, साहित्य व संस्कृतिया थपूया निंतिं यानाच्वंगु ज्यायात च्वछासें वइगु दिनय् नं ग्वाहालि यानाच्वनेगु प्रतिवद्धता प्वंकादिल ।
ज्याझ्वलय् यल मनपा वडा ल्याः – १६ या आर्थिक ग्वहालिं प्यंगू विधाय् योगदान यानादीपिं छसिकथं बौद्ध विद्वान लोकबहादुर शाक्य, संस्कृति शिरोमणि हरिराम जोशी, संगीतकःमि अमरराज शर्मा व कलापाखे बत्सगोपाल वैद्ययात नगदनापं हनापौ लःल्हासें हंगु खः । अथे हे वडा ल्याः १६ या हे आर्थिक ग्वाहालि व नेपालभाषा चिबाखं साहित्य नापंया सहकार्यय् मंकाः खलःया प्रकाशनय् सच्छि व न्याम्ह चिबाखं च्वमिपिनिगु चिबाखं दुथ्यागु चिबाखं मुना सफू ‘ल्वापु खिचा’ नं पाहाँपिन्सं मंकाःकथं उलेज्या यानादीगु खः ।
उलेज्या लिपा जूगु बन्दसत्रय् मंकाः खलःया छयाञ्जे महेन्द्रलाल महर्जनं न्ह्यब्वःगु वार्षिक प्रतिवेदन व दाँभरी उकुलाल महर्जनं न्ह्यब्वःगु आर्थिक प्रतिवेदनय् सहलह यानाः सर्वसम्तं पारित याःगु खः धाःसा नेपालभाषा मंकाः खलः यलया न्हूगु कार्यसमितिया ल्यज्या मंसिर ६ गते शनिबार सुथसिया ८ः०० ताः ईनिसें २ः०० ताः ईतक जुइगु खँ धाःगु दु ।
