येँ/ट्रेलमाण्डुं शनिबार ‘फ्लड रिलिफ १० के ट्रेल रन’या ग्वसाः ग्वःगु दु । ट्रेलमाण्डुया संस्थापकनापं अल्ट्रा रनर रसिला तामाङया संयोजकत्वय् भोटेकोशी क्षेत्रय् वःगु बाढीं पिडित जूपिनिगु सहयोगार्थ थ्व ट्रेल रन जुइत्यंगु खः । संयोजक रसिलां स्वेदशी व विदेशी यानाः ३० स्वयां अप्वसिनं अल्ट्रा रनरं फ्लड रिलिफ ट्रेल रनय् दर्ता यायेधुंकूगु जानकारी बियादिल । स्वयम्भूं न्ह्याइगु थुगु दौड इचंगु, सेतो गुम्बा जुयाः हाकनं इचंगुपाखें स्वयम्भूइ थ्यंकाः क्वचाइ । रसिलां धयादी, थुगु दौडं संकलित दक्व रकम प्रधानमन्त्री दैवी प्रकोप उद्धार कोषय् जम्मा यायेगु जुइ । वय्कः छुं दिं न्ह्यः तिनि स्विट्जरल्यान्डया ग्राचेन व फ्रान्सया ला ग्रेभय् निलाया प्रशिक्षण कयाः नेपाः लिहांझाःगु खः । प्रशिक्षणया झ्वलय् हे रसिलां फ्रान्सया अल्ट्रा रेस प्रतियोगिताय् ब्वति कयादीगु खः । वहे रेसया दौरानय् जुनिपर ट्रस्टनापंया सहकार्यय् वय्कलं एक लाख ध्यबा बाढीपिडितपिनिगु निंतिं ग्वाहालि मुंकादीधुंकूगु दु । निदँ न्ह्यःनिसें जुनिपर ट्रस्टनापं मिलेजुयाः रसिलां जलवायु परिवर्तनय् नं यक्व ज्या यानादीगु खः । एसिया ट्रायल मास्टर्स त्याकूम्ह नेपाःया न्हापांम्ह अल्ट्रा धाविका रसिलां व ट्रस्टनापं मिलेजुयाः न्याद्वः सिमा पिइगु ज्या नं यानादीगु खः ।
The Most Popular Magazen in Newar Society
