जेन–जीया आन्दोलन व इमिगु ज्ञापन–पौ

थीथी २३ गू जेन–जी समूहतय्सं थःपिनिगु मागत पूमवंकल धाःसा प्रधानमन्त्री सुशीला कार्कीयात सरकारपाखें लितकायेमाःगु आवश्यकताया बारे न्ह्यथँसें राष्ट्रपति रामचन्द्र पौडेलसमक्ष न्यागू बुँदाया ज्ञापन–पौ लःल्हानाः प्रत्यक्ष जननिर्वाचित प्रधानमन्त्रीया निंतिं संविधान संशोधन यायेत माग याःगु खँ थीथी संचार माध्यमपाखें सार्वजनिक जूगु दु । थुकथं जेन–जी समूहतय्सं थःगु मागत पूमवंगु खँ इलय् हे वःगुयात जेन–जीया सक्षमताया छगू नमुना खः धकाः धायेफु । तर थ्वस्वयां न्ह्यःया सरकारय् गुलि नं राजनीतिक दलया थःथवय् सहमतिकथं काले काले मिली भाले खाने धाःथें अप्रजातान्त्रिक प्रवृत्ती न्यायपालिकातक नं लागू याःगु हुनिं थौंतकया न्यायाधीशपिं नं भागबन्डाय् नियुक्ति जूगु खः । गुकिया हुनिं थुपिं न्यायाधीशपिंपाखें इलय्ब्यलय् निष्पक्ष न्यायिक निर्णय वइगु खँय् अवरोध जूवनेगु व जुयाच्वंगु खँ जनतां भोगेयायेमाःगु दु । राजनीतिक शास्त्रकथं अर्थात् लोकतन्त्रय् न्यायपालिका स्वतन्त्र जुइ हे माः । थुकिया अर्थ कार्यपालिका व व्यवस्थापिका निगूपाखें हस्तक्षेप जुइमज्यू धइगु खँ खः । वर्तमान संविधान २०७२ या धारा १२९ या उपधारा (२) कथं संवैधानिक परिषदया सिफारिसय् प्रधानमन्त्री व न्यायपरिषद्या सिफारिसय् सर्वोच्च अदालतया मेमेपिं न्यायाधीशया नियुक्ति राष्ट्रपतिपाखें जुइ धइगु खँ धयातःगु दु । तर थ्व खँ न्हापायापिं सरकारपाखें पालन जूगु मदु । थुकिं थ्व प्रमाणित जुइ कि नेपालय् लोकतन्त्र वःगु मदुनि । कथित लोकतन्त्र धकाः जक थुइकेमाः । थुपिं खँत जेन–जी पुचलं बांलाक थुइकाः अध्ययन यानाः पुलांगु राजनीतिक दलया भ्रष्ट राजनीतिक नेताकार्यकर्तात आः वइगु सरकारय् वनेमफइगु प्रावधान मन्त धाःसा हाकनं थुमिगु हे रजाईं जुइगु हुनिं आः जूगु आन्दोलनया अर्थ नं दइमखु । थुपिं खँया ख्याल यानाः जेन–जी पुचलं गुकथं ज्यू, न्ह्याथेंजाःगु मूल्य चुकेयायेमाःसां हाकनं आन्दोलन यानाः सां थुपिं भ्रष्ट नेतातय्त सरकारय् वनेगुपाखें पनेफय्केमाः । जनताया साथ दइगु खँ नकारे यायेफइमखु । जनताया साथ दया हे च्वनि ।