निख्यर निपा ल्हातिइ
जन्म व मृत्युया
न्यवलं चिकातःम्ह जि
जिन्दगीया थ्व धुँकासाय्
धुँयात च्वलय्चातसें थें
कुंकाच्वने इलं हर घडीइ !
अय् जन्म व मृत्युया सिखः !
जि पराजित छिमिगु पंजः दुने,
छिपिंलिसे विद्रोह यायेत
खः जिके गुगुं तुपः मदु,
छिपिंपाखें मुक्ति कायेत
खः जिके गुगुं सङ्गीन मदु
जिन्दगीया थ्व धुँकासाय्
च्वलय्चा कुने मफुम्ह धुँ जि
छगू बाध्यता दुने मौन व निश्चल !
थ्व क्वथाया सीमावद्धतां अन्धकार जुयाः
जितः मिखा पीकी,
जि इइपने, मिखा तिस्सी जिं,
कत्तिक, कत्तिक ल्वहं जुयाः
पलख आत्मविस्मृतिइ तनेत !
परन्तु आश्चर्य ! जिगु थ्व बन्द मिखां पिहां वइ
छगू ज्योति – छगू विद्रोह जुयाः
आमैया ख्वात्तुगु खिमिलां पल्पसा लू थें !
अय् जितः थःगु पन्जाय् तयातःपिं जन्म व मृत्यु !
जि थौं पराधीन खयाः नं, ल्वहं मखु, मखु खनि
मखुसा जितः न्ह्याकातःगु न्यवलय् न्हाय्पं तयाः छकः न्यँ
थन जिगु नाडीया स्पन्दन गुकथं तायेदइ !
अय् जन्म व मृत्यु !
छिमिसं पीकातःगु जिगु थ्व बन्द मिखा
थौं स्वयं छगू युद्धमोर्चा जुयाब्यूगु दु,
गन जिगु बःबः अस्तित्वबोधत
वीर योद्धा जुयाः झ्वःझ्वः दंवइ,
स्वत्वाभासया ध्वाँय् ज्वनाः गन जिगु
प्रत्येक चिम्सँप्वाःत हूल हूल, लश्कर लश्कर जुयाः चिल्लाय् दनावइ !
जितः कुनातःपिं अय् जन्म व मृत्यु !
छिमिगु पराधीनता दुने नं,
छगू संग्राम जुयाबी जिगु थ्व आत्मबोध !
विद्रोह जुयाबी जिगु थ्व अहं !
दुने दुने म्हुत्तुम्हुयाः छिमिगु पंजः
कुमिचां थें भ्वाभः याइगु
छगू अभियान जुयाबी जिगु थ्व आत्मचेतन !!
•
