किपू/किपू नगरपालिकाया प्रमुख कृष्णमान डंगोलयात किपूया नीजि ब्वनेकुथिइ नेपालभाषा अनिवार्य यायेमाःगु खँय् ध्यानाकर्षण याःगु दु । नेपालभाषा अभियानकर्तापिं नेवाः बस्ती नेवाः स्कूल अभियानया कजी दीपक तुलाधर व नेवाः विद्यार्थी युनियनया नायः रिदेन महर्जनं मंकाःकथं नगर प्रमुखयात नापलानाः ध्यानाकर्षण यानादीगु खः ।
नेवाः बस्ती नेवा स्कुल अभियानया कजी दीपक तुलाधरं किपू नगरपालिकाय् नेपालभाषाया व्यवस्थित अध्ययन सुनिश्चित यायेत अनुगमन समिति दयेकेमाःगु खँय् ध्यानाकर्षण यानादीगु खः । अथे हे नेवाः विद्यार्थी युनियनया नायः रिदेन महर्जनं किपूया निजी ब्वनेकुथिइ नेपालभाष अनिवार्य रुपं ब्वंकेगु व्यवस्था मजूगु खँय् ध्यानाकर्षण यानादीगु खः ।
किपू नगरपालिकाया प्रुमुख कृष्णमान डंगोलं थौंकन्हय् किपूया स्थानीय सरकारी ब्वनेकुथिइ ६ तगिंतक नेपालभाषा ब्वंकेगु ज्या जुयाच्वंगु जानकारी ब्यूसें आः नीजि ब्वनेकुथिइ नं थुकियात अनिवार्य यानाः यंकेगु बचं बियादिल ।
नेपाःया संविधानय् मातृभाषां अध्ययन अध्यापन यायेगु व बागमती प्रदेशय् कामकाजी भाषाया रूपय् कार्यान्वयन जूगु अवस्थाय् नेपालभाषा ब्वनेकुथिइ ब्वंकेगु व्यवस्था जूसां नं किपू लागाय् नीजि ब्वनेकुथिइ नेपालभाषां आखः ब्वंकेगु व्यवस्था बांलाक मजूगु खँय् इलय् ब्यलय् वय्कःपिन्सं ध्यानाकर्षण यानाच्वनादीगु दु ।
