यल/यलया मल्ल जुजु सिद्धिनरसिंह मल्लया पालय् नेपाल सम्वत् ७५१ निसें निरन्तर न्ह्यानावयाच्वंगु ऐतिहासिक नृसिंह जात्रा उपाकलं सायाः साउन १६ गते गुँलागा पंचमीखुन्हु जुल । उपाकर्म गुथिया वरिष्ठताया आधारय् पाः कयाः न्ह्याकीगु थुगु जात्रा थुगुसी अग्नीशाला बःलिम्ह त्वाःया भूपतिराजानन्द राजोपाध्यायया परिवारयात पाःलाःगु खः । पाःकाःम्हेसित उपाकर्म गुथि व्यवस्थापन समिति, श्री नृसिंह जात्रा व्यवस्थापन समिति व श्रीनृसिंह जात्रा समारोह समितिं जात्रा न्ह्याकेत ग्वाहालि याइ ।
प्राकृतिक प्रकोपं बचेजुइत, जनकल्याण व विश्व शान्तिया कामना यासें थुगु जात्रा न्याय्काः वयाच्वंगु खँ ग्वसाः खलकं धाःगु दु । कात्ति प्याखनय् पिहां वइम्ह नृसिंह उग्र रुपयाम्ह खः धाःसा जात्राय् पिहां वइम्ह नृसिंह शान्त स्वभावम्ह खः धइगु धापू दु ।
पाःलाःगु परिवारया पुरोहित, जिलाजं वा भिंचामध्यय् छम्हेसिनं नृसिंहया स्वरूप धारण यानाः नृसिंह देवगणया पुचलं सांस्कृतिक वाद्यवादननापं थुगु जात्रा पुञ्चलिं न्ह्यानाः गाःबहाः, प्यंगःथां, पिम्बहाः, बालिफः, नकबही, क्वालखु, झटापोल, क्वन्ति, क्वबहाः, स्वँथ, मंगलबजाः, हःखा, लुँहिति, ओकुबहाः, थैना, चक्रबही, हौगः, तिच्छुँगल्लि, इखालखु, वँला जुयाः पुञ्चलिइ वयाः क्वचाःगु खः ।
