थिमि/मध्यपुर साहित्य क्यबया ग्वसालय् जूगु छगू ज्याझ्वःया दथुइ कवि एवं साहित्यकार सूर्यप्रसाद लाकोजूं च्वयादीगु कविता संग्रह ‘एक झुल्को घाम’ मूपाहां वरिष्ठ कलाकार ख्यालिजुजु मदनकृष्ण श्रेष्ठं विमोचन यानादिल ।
क्यबया नायः वसन्त नकर्मीया सभापतित्वय् जूगु उगु ज्याझ्वलय् विशेष पाहांपिं समालोचक डा. ज्ञानु अधिकारी व रमेशचन्द्र अधिकारीं सपूmया बारे समीक्षा यानादीगु खः । वय्कःपिन्सं थुगु कविता संग्रह सफुतिइ कविताया भाव शैली, देश प्रेम, नेपाली समाज, संस्कृति, मानवीय संवेदना, प्रेम, संघर्ष, राजनीतिक बेथिति लगायतया विषयवस्तु दुथ्याःगु खँ धयादिल ।
क्यबया छयाञ्जे प्रेम के. निडरं लसकुस न्वचु बियादीगु उगु ज्याझ्वलय् सफुतिइ दुथ्याःगु कवितात कविपिं बुद्धिकृष्ण घो, ध्रुवकृष्ण ताम्राकार, हिसिलिना शाक्य, रहेना मानन्धर नकर्मी व विनिता वज्राचार्यं वाचन यानादीगु खः ।
क्यबया दुजः तुलसीहरि प्रजापतिं न्ह्याकादीगु उगु ज्याझ्वलय् भक्तपुर साहित्य समाजया नायः राजुराम मुनकर्मीं कवि सूर्यप्रसाद लाकोजूया व्यक्तित्व व योगदानयाबारे न्वंवानादीगु खः । ताःईन्ह्यःनिसें साहित्य व साहित्यिक पत्रकारिताय् सक्रिय जुयादीम्ह लाकोजूया थुगु सफू न्हय्गूगु खः ।
