यल/यल महानगरपालिकां २०४६ सालया जनआन्दोलनलिपा बन्द याःगु ऐतिहासिक शारदा पुस्तकालय हाकनं सञ्चालन याःगु दु । २०४६ सालया जनआन्दोलन न्ह्यः मंगलबजारय् तत्कालीन ललितपुर नगर पञ्चायतया भवनय् सञ्चालन जुयाच्वंगु शारदा पुस्तकालय जनआन्दोलनलिपा अस्तित्वविहीन थें जुयाच्वंगु खः । ताःईनिसें बन्द जूगु पुस्तकालययात ललितपुर महानगरपालिकां थःगु हे भवनय् हाकनं सञ्चालनय् हःगु खः ।
पुस्तकालयया उलेज्या यासें संस्कृति शिरोमणि हरिराम जोशीं ताःईनिसें ओझेलय् लानाच्वंगु व मृतप्रायः अवस्थाय् थ्यंगु शारदा पुस्तकालय हाकनं सञ्चालनय् हःगु महत्वपूर्ण उपलब्धि जूगु धासें पुस्तकालयं ज्ञानया प्रचार–प्रसार व ब्वनेगु संस्कृतिया विकासय् महत्वपूर्ण योगदान जुइगु विश्वास यानादिल । ‘शारदा पुस्तकालयया इतिहास २००४ सालय् राणाकालनिसें शुरु जूगु खः । थुकियात पुनः जीवन्त व सक्रिय यायेगु ज्याय् प्रबुद्ध व्यक्तित्वपिं लगेजुयादी धइगु विश्वास दु,’ संस्कृतिविद् जोशीं धयादिल । ताःईनिसें अस्तित्वय् मदुगु स्मरण यासें वय्कलं महानगरपालिकां थुकियात हाकनं उचित थाय् व सम्मान ब्यूगुलिं सुभाय् बियादिल ।
यल महानगरपालिकाया प्रमुख चिरीबाबु महर्जनं आधुनिक सहरय् सार्वजनिक पुस्तकालय व ‘सिटी हल’ अपरिहार्य जूगु खँय् बःब्युसें महानगरपालिकां ब्वनेगु संस्कृतिया संरक्षण व विकासयात प्राथमिकताय् तयाः संचालन यानागु शारदा पुस्तकालयप्रति महानगरपालिका संवेदनशील जूगु खँ धयादिल । शताब्दी पुरुष सत्यमोहन जोशीं शारदा पुस्तकालय पुनःस्थापना यायेत थःत पटक–पटक प्रेरित याःगु खँ लुमंकुसें वय्कलं २०४६ सालया जनआन्दोलनया झ्वलय् क्षति जूगु व तनाच्वंगु पुस्तकालयया इतिहास व सम्पदायात संरक्षण यानाः न्हूगु पुस्तायात लःल्हायेत थःपिं प्रतिवद्ध जूगु धयादिल ।
शारदा पुस्तकालयया पुनःस्थापनां यलया ऐतिहासिक पुस्तकालय परम्परायात पुनर्जीवन ब्यूगु व न्हूगु पुस्ताय् ब्वनेगु संस्कृतिया विकास याइगु अपेक्षा याःगु दु ।
