यल/ताम्रकार कुलदेवता उग्रचण्डी माई संरक्षण समिति (ताम्रकार समाज) या नीन्ह्यक्वःगु मंकाः मुँज्या व नीक्वःगु तःमुँज्याया उलेज्या मूपाहाँ नेपालभाषा एकेडेमीया चान्सलर मल्ल के. सुन्दरं यानादिल । उलेज्या यासें वय्कलं लिच्छवी जुजु अंशुवर्माया कैलाशकूट दरवारय् दुगु लीया पौ लगायतया ज्वलंया निर्माण ताम्रकार वर्ग याःगु धइगु खँ शिलालेखय् उल्लेख जुयाच्वंगुलिं थुकिया बारे थप अध्ययन अनुसन्धान यायेमाःगु खँ न्ह्यथंसे ताम्रकार समाजं थीथी पंगःयात चिइकाः थौंया थ्व अवस्थाय् थ्यंकेत याःगु संघर्ष मेमेगु संघ संस्थाया निंतिं नं प्रेरणाया श्रोत जूवंगु खँ
धयादिल ।
समाजया नायः विनोद ताम्रकारया सभापतित्वय् जूगु उगु ज्याझ्वलय् नेपालभाषा मंकाः खलः यलया नायः महेन्द्र महर्जन, यल नेवाः समाजया नायः नानीकाजी शाक्य, समाजया निवर्तमान नायः रविन्द्रराज ताम्रकार लगायतं पाहाँकथं आसन ग्रहण यानादीगु खः । समाजया भजन उपसमितिं भजन हालाः न्ह्याकूगु उगु ज्याझ्वलय् समाजया ज्येष्ठ नागरिकपिन्त व एस. ईईनिसें स्नातकोत्तर तह ताःलाःपिं समाजया ब्वमिपिन्त हंगु खः । अथे हे ज्याझ्वलय् दाता हना, आजीवन दुजःपिन्त दसिपौ व दँय्दँसं लःल्हाना वयाच्वंगु उग्रचण्डी प्रतिभा हना थुगु दँय् चित्रकला विधा व च्वमि कृषा ताम्रकारयात नगद झिंन्याद्वःनापं हनापौ मूपाहाँनं लःल्हाःगु खः ।
उलेज्या लिपा जूगु बन्दसत्रय् मूछ्याञ्जे दिपेश ताम्रकारं वार्षिक प्रतिवेदन व दांभरि विमल ताम्रकारं न्ह्यब्वःगु आर्थिक प्रतिवेदन सर्वसम्मतं पारित याःगु खः । बन्दसत्रं मेगु कार्यकालया निंतिं विनोद ताम्रकारयात हे अध्यक्षय् निर्विरोध ल्यःगु दु धाःसा दुजलय् छसिकथं शम्भुगोविन्द ताम्रकार, दिपेश ताम्रकार, विमल ताम्रकार, बिजय ताम्रकार, मनोज ताम्रकार(नक्साल), प्रवल ताम्रकार, मिला ताम्रकार, मनोज ताम्रकार (हौगल), निता ताम्रकार, सजेश ताम्रकारयात निर्विरोध ल्यःगु दु । समाजया विधानकथं दुजःपिनिगु पद विभाजन कार्यसमितिया बैठकं याइगु खँ धाःगु दु ।
