यल/मदनराज ताम्रकारं च्वयादीगु ‘अतीतको झझल्को’ सफू ताम्रकार समाजया भवनय् जूगु छगू ज्याझ्वःया दथुइ साहित्यकार प्रा.डा. तुलसीप्रसाद भट्टराईनं विमोचन यानादिल । सफू विमोचनलिपा नुगःखँ तयेगु झ्वलय् प्रा.डा. भट्टराईनं च्वमि मदनराज ताम्रकारं अवकाशलिपाया जीवनयात सार्थक दय्केगु कुतः याःगु खँ न्ह्यथँसें समाजया निंतिं थःगु जीवनया अनुभवत दस्तावेजीकरण याःगु धयादिल । जीवन धइगु संघर्ष हे संघर्षया लँपु खः, उकिं वय्कःया संघर्षमय जीवनया बारे च्वयादीगु थ्व सफू वय्कःया परिवारया निंतिं जक मखु, ताम्रकार समाज व नेपाली समाजया निंतिं उपयोगी जुइगु खँ वय्कलं धयादिल ।
ज्याझ्वलय् उप प्रा. एवं समालोचक तेजविलास अधिकारीं थ्व आत्मकथा सफुतिं इतिहास व साहित्यया माध्यमं समाजयात प्रेरणा बीगु खँ धयादिल । अथे हे नेपाल पुजा प्रतिष्ठानया कोषाध्यक्ष विजयकुमार गौतमं समाज, जीवन व यथार्थतायात सफुतिइ न्ह्यब्वःगु धासें वय्कलं जीवनया अनुभव, सफलता व संघर्षयात चित्रण याःगु धयादिल । नापं वय्कलं नेपाली साहित्यय् संस्मरण साहित्यया बिस्कं महत्व दुगु खँ नं धयादिल ।
नुगःखँ तयेगु झ्वलय् च्वमिया काय्नापं सफूया प्रकाशक किर्तनराज ताम्रकारं थुगु सफू साहित्यिक कीर्ति जक मखसे थः बाःयागु जीवनया संघर्ष, अनुभव व प्रेरणायात नं प्रतिविम्बित याःगु खँ धयादिल । अथे हे प्रा.डा. कुमार कोइरालां थुगु सफू कर्मय् विश्वास याइम्ह ताम्रकार परिवारया बाखं दुगु व सफुतिइ १४ गू शीर्षकय् जीवनया अतीतया विषयवस्तुनापं स्वापू दुगु व नेपाली सामाजिक परिवेशया विषयवस्तुत दुथ्याःगु खँ धयादिसें थुगु सफूया प्रेरणादायी खँ समाजया निंतिं आदर्श जुइगु धयादिल ।
ज्याझ्वःया सभापति एवं ताम्रकार समाजया निवर्तमान अध्यक्ष रवीन्द्रराज ताम्रकारं सफू च्वयेगु धइगु तसकं चुनौतीपूर्ण ज्या खः धासें ताम्रकार समाजया व्यक्तित्वं तयार याःगु थ्व सफू समाजया निंतिं तसकं महत्वपूर्ण व उपयोगी जूगु खँ धयादिल ।
