थिमि/दबुलि नेपालया ग्वसालय् जूगु छगू ज्याझ्वःया दथुइ संस्कृतिकर्मी एवं साहित्यकार गणेशराम लाछीं च्वयादीगु प्यंगू सफू मध्यपुर थिमि नगरपालिकाया प्रमुख सुरेन्द्र श्रेष्ठ, नेपालभाषा एकेडेमीया चान्सलर मल्ल के. सुन्दर व भाषा आयोगया दुजः सुरेश किरण मानन्धरं मंकाःकथं विमोचन यानादिल । लाछीं च्वयादीगु नेपालभाषाया ‘हेंग्वाः जूम्ह मनू’ उपन्यास, ‘कय्ता तंम्ह नेवाः’ नाटक व नेपाली भाषाया ‘सिक्किम यात्राको सेरोफेरो’ संस्मरण व ‘अमूर्त सम्पदाभित्र’ सफू विमोचन जूगु खः ।
दबुलि नेपालया कजि सन्तोष प्रजापतिया सभापतित्वय् जूगु उगु ज्याझ्वलय् प्यम्ह साहित्यकारपिं छसिकथं पोखराया तीर्थ श्रेष्ठ, ख्वपया अभय श्रेष्ठ, पनौतीया सूर्यप्रसाद लाकोजु व थिमिया रत्न प्रजापतियात ‘तेजकृष्ण नानिमाया लुमन्ति हना’पाखें हंगु खः । नेपाली साहित्यय् ल्हाः न्ह्याकाः लोकंह्वाःपिं वय्कःपिन्त मातृभाषां नं साहित्यिक रचना सृजना यायेत प्रोत्साहन बीगु उद्देश्यं थथे हनागु खँ ग्वसाः खलकं धाःगु दु ।
