यलय् जूगु १५क्वःगु यल कप ब्याडमिन्टन कासाय् नागबहालं ट्रफी कब्जा याःगु दु । नागबहाःया कासामितय्सं स्वक्वःतक लगातार सिरपा त्याकाः ट्रफी कब्जा याःगु खः । नागबहालं न्यागूमध्ये स्वंगू इभेन्ट त्याकाः टिम च्याम्पियनसिप ट्रफी त्याकूगु खः । थ्वलिसें नागबाहालं रनिंग ट्रफीया अधिकार सुरक्षित याःगु दु ।
नागबहाःया सशिन डंगोल व सुमन शाक्यया जोडीं मिजं युगल उपाधिया सफल रक्षा याःगु दु । डंगोल व शाक्यया जोडीं फाइनलय् ओकुबहालया दिपेश शाक्य व निशेश शाक्यया जोडीयात २१–१२, २२–२० या सेटं बुकाः उपाधिया रक्षा याःगु खः ।
अथे हे मिक्स डबल्सय् नं नागबहाःया सशिन व सुधा शाक्यं उपाधि त्याकूगु खः । थ्व जोडीं नागबहाःया हे सुमन शाक्य व लसता शाक्यया जोडीयात १७–२१, २१–१२, २१–१४ या सेटं बुकाः दोहोरो उपाधि त्याकूगु खः ।
मिजं युगलय् प्रयाग पोखरीया सुनिल बाराही व पुजन चित्रकार जोडी व दथुलँया राजु वज्राचार्य व सुमित महर्जनया जोडी मंकाः स्वंगूगु थासय् लाःगु खः ।
पुरुष डबल्स विधाय् विजेतां ५० हजार नगद त्याकल धाःसा उपविजेतायात २५ हजार व लियांल्यू लाःम्हेसित १० हजारलिसें पदक, ट्रफी व दसिपौ लःल्हाःगु खः ।
अथे हे मिक्स डबल्स विधाया विजेता, उपविजेता व सेमिफाइनलिष्टयात पदक, ट्रफी व दसिपौलिसें छसिकथं २५ हजार, १५ हजार व ५ हजार नगद सिरपा लःल्हाःगु खः ।
मास्टर्स ४५ं विधाय् लाःगु भिन्छेबहाःया अनिल वज्राचार्य व सुगतरत्न शाक्यया जोडीं भिन्छेबहाःया शान्तरत्न वज्राचार्य व राजभाई वज्राचार्यया जोडीयात बुकाः सिरपा त्याकल । उगु कासाय् पिंछेँया राजेश महर्जन व राजु महर्जनया जोडी व ओकुबहालया शान्ता डंगोल व स्वदेश शाक्यया जोडी मंकाः लियांल्यू लाःगु खः । विजेतायात २० हजार, उपविजेतायात १० हजार, स्वंगूगु थासय् लाःम्हसित ५ हजारलिसें पदक, ट्रफी, व दसिपौ लःल्हाःगु खः ।
मिसा एकलपाखे चिकुबहाःया तिशारानी शाक्यं भिन्छेबहाःया कृष्मा वज्राचार्ययात २१–९, २१–८ या सेटं बुकाः उपाधि त्याकूगु खः । स्वंगूगु थासय् नागबहाःया सुधा शाक्य व लसता शाक्य लाःगु दु । शीर्ष स्वंगू थासय् लाःपिंत छसिकथं १५ हजार, १० हजार व ५ हजार तका नगदलिसें पदक, ट्रफी व दसिपौ लःल्हाःगु खः ।
ब्वाइज यु–१५ पुचलय् नागबहाःया सविन शाक्यं सिरपा त्याकूगु खः । शाक्यं ओकुबहाःया आरभ शाक्ययात २१–१५, १४–२१, २१–१७ या सेटं बुकूगु खः । स्वंगूगु थासय् भिन्छेबहाःया रोनिश वज्राचार्य व क्वन्तिया बिशेक खड्गी लाःगु खः । शीर्ष स्वंगू थासय् लाःपिन्त छसिकथं २५ हजार, १५ हजार व ५ हजार तका नगदलिसें पदक, ट्रफी व दसिपौ लःल्हाःगु खः ।
शीर्ष स्वंगू थासय् लाःपिं कासामिपिन्त ललितपुर महानगरया मेयर चिरिबाबु महर्जनं ट्रफी, मेडल व नगद सिरपाः लःल्हाःगु खः ।
