यल/नेपालभाषा एकेडेमी व यल महानगरपालिकाया मंकाः ग्वसालय् येँयाःबलय् यलय् खःप्याखं (दबू प्याखं) क्यनीगु जूगु दु । यल महानगरपालिकाया सभाकक्षय् पत्रकार सम्मेलन यासें उगु खँया जानकारी ब्यूगु खः । न्हापा न्हापा येँयाःबलय् नेवाःतय्सं न्ह्याकावयाच्वंगु लोकंह्वाःगु खःप्याखं थौंकन्हे न्हनावंगु अवस्थाय् थ्यनेधुंकूगु दु । नेवाःतय्सं न्ह्याकाच्वंगु थज्याःगु अमूल्य धरोहरयात ल्यंकाः तयेमाः धइगु उद्देश्यं नेपालभाषा एकेडेमीया ग्वसालय् व यल महानगरपालिकाया आर्थिक ग्वाहालिइ खःप्याखं क्यनेत्यनागु खँ एकेडेमीया चान्सलर मल्ल के. सुन्दरं धयादीगु खः । न्हापांखुसी यलया स्वंगू दबुलिइ खःप्याखं क्यनेगु ज्या जुइगु व वयां लिपा स्वकुमिपिनिगु मागकथं मेमेगु थासय् नं क्यनेगु योजना दुगु खँ नं वय्कलं धयादिल ।
नेपालभाषा एकेडेमी, दबू प्याखं क्यनेज्या समितिया कजि विजयरत्न असंबरें न्ह्याकादीगु उगु पत्रकार सम्मेलनय् समितिया दुजः प्राज्ञ राजितबहादुर श्रेष्ठं प्रेस वक्तव्य ब्वनाः न्यंकादीगु खः । यल महानगरपालिकाया प्रवक्तानापं वडा नं ९ या वडा अध्यक्ष राजु महर्जन व एकेडेमीया सदस्य सचिव महेन्द्रगोपाल कर्माचार्यं नं नुगःखँ तयादीगु उगु पत्रकार सम्मेलनय् कलाकारपिन्त उचित पारिश्रमिकया व्यवस्था नं यानागु जानकारी ब्यूगु खः ।
