नेपाः देय्या प्राचीन संस्कृति, सम्पदानापं स्वापू तयाः थःगु सोच दुथ्याकाः हलिमय् न्यंक नेपाःदेय् म्हसीकेगु नापं थःगु व्यवसाय स्वीन्यादँ न्ह्यःनिसें थौंतक न्ह्याकावयाच्वनादीम्ह व्यवसायी, यल देय्या छम्ह हस्ती भाजु प्रदिपमान शाक्यनापं न्हू प्रेष्टिज नेपाःपाखें न्ह्याकागु खँल्हाबल्हाय् वय्कलं थःगु धापू थुकथं न्ह्यब्वयादीगु दु – Shraman Apparels संस्था स्वीन्यादँन्ह्यः नीस्वनाः यल देय्या लगंख्यः महालक्ष्मी स्थानं गार्मेन्ट पैmक्टरीकथं ज्याखँ न्ह्याकागु खः । थ्व सन् १९९० या खँ खः । उगु इलय् जि थः नं युवा अवस्थायाम्ह जुल । उबले नेपालय् अमेरिकाया निंतिं इमिगु हे डिजाइनय्, इमिगु हे अर्डरकथं उत्पादन जक यायेगु ज्या तसकं चलेजूगु खः । उबले मेमेगु गार्मेन्ट उद्योगंथेंतुं जिमिसं नं प्रोडक्सन जक यायेगु खः । उगु इलय् अमेरिकां वइगु अर्डरयात माःगु कच्चा पदार्थ दक्वं इण्डियां आयात यानाः अर्डर याःगु सामान दय्काः छ्वयेगु जक ज्या जुल । उबले थःपिनिगु डिजाइन आइडियाकथं ज्या यायेगु मखु, इमिसं धाःथें ज्या जुइमाः । अले वहे कथं ज्या न्ह्याकाच्वनागु जुल । थुकथं ज्या यायां वनाबलय् थःपिं नं भचा भचा सयावल, अनुभव दयावल । भचाभचा सयेधुंकाः १९९५ पाखे जितः छु बिचाः वल धाःसा इमिगु जक भरय् गुलि
च्वनेगु । झी ला थन हे च्वंपिं । इमिगु अर्डरय् जक ज्या यानाः मजिल, कन्हय् अर्डर मवल कि समस्या जुइ । ज्या यासेंलि बांलाक लिपातकया बिचाः यानाः यायेमाल । उकिं थःगु हे ब्राण्डया प्रोडक्ट, थःगु हे मार्केट अले र मेटिरियल नं थःपिनिगु हे चलेयायेमाः धकाः थुकिया निंतिं भक्तपुरय् चाःहिलाबलय् अनया मौलिकता दुगु बांलाःगु कापः लुयावल । अले वहे कापः स्याम्पलकथं
कयाहया । उकी थःपिनिगु परम्परागत, भचा मोडर्नाइजेशन व वेष्टर्न मिलेयानाः श्रृजनात्मक डिजाइन तयार याना । अले व डिजाईन ज्वनाः जापान वना । जापानय् Buyer नं लुयावल । अले जापानय् एक्सपोर्ट मदिक्क जुयावन । Buyer नं बढे जुयावन । थ्वहे झ्वलय् जिमिसं १९९७ य् करुणा नेचुरल वयर्स नां तयाः ब्राण्ड दय्का । करुणा ब्राण्ड फ्रान्स, जापान, जर्मनी, क्यानाडा इत्यादि देसय् बांलाक निर्यात जुल । थुकी Hemp, Bamboo, Linen, Cotton आदि कापः प्रयोग याना । थुकथं झीसं थःगु मौलिक प्रोडक्टया विकास यानागु खँ वय्कलं धयादिल ।
३५ दँतक व्यवसाय न्ह्याकेगु झ्वलय् छुं कथंया पंगः, समस्या वःगु दु कि धयागु न्ह्यसःयात कयाः वय्कलं धयादिल, नेपाः देय् दुने राजनीतिक कारणं तःधंगु समस्या वसेंलि यक्वसिया ज्या बन्द नं जुल । थन नं खाली खाली थें हे जुल । थथे जूबलय् ज्या न्ह्याकेत तःधंगु समस्या जूगु खँ न्ह्यथँसें वय्कलं धयादिल कि जिं सिर्फ गार्मेन्ट जक धयाः मच्वंसे थःपिनिगु मौलिककथं व्यवसाय न्ह्याकेगु दुनुगलंनिसें मतिइ लुइकाः लिपा दरबारमार्गय् पसः तयागु खः । नेपाली कापः, नेपाली लंया नेपाली ब्राण्डया पसः दरबारमार्गय् सायद न्हापांगु झीगु हे जक जुइ । न्ह्याम्हेसित नं जिइक लं तयार याना । अन पसः नं चलेजुल ।
थ्वहे झ्वलय् छन्हु छम्ह म्हस्यूम्ह डिजाइनरं जितः नापलाःबलय् ‘छिकपिनिगु थ्व लं ला भचा थिके जुल, जिमित न्यायेत थाकुल नि’ धकाः धाल । थ्व भचा थिके ला जुइगु हे जुल । कापः हे थिकेगु जुल । तर थुकें जितः छु बिचाः वल धाःसा नेपाःमिपिन्सं न्यायेमफुगु लं दय्काः छु यायेगु, आः भचा दंगु सकल नेपाःमिपिन्त ल्वयेक न्यायेफइगु कथं तयार यायेमाल धकाः सन् २०१३ य् जुजु वयर्स ब्राण्ड दय्काः जुजु वयर्सया नामं यलया झम्सिख्यलय् शो–रुम तयागु खः । अन वहे त्वालय् च्वनादीम्ह उगु इलय्या प्रमुख सेनाध्यक्ष गरुड शम्सेरं नं झीगु वसःयात यक्व यय्कादिल । नापं वय्कलं व्यवसाय ताःलाकेत इलय्–ब्यलय् शो–रुम चाःहुलाः यक्व हौसला बियादीगु खँ वय्कलं कनादिल । वय्कलं लसता प्वंकाः धयादिल, थ्व थुलि बांलाक चलेजुइ धकाः बिचाः यानागु मखु तर थुकियात नेवाःतय्सं जक मखु नेपाःदुने व नेपाःपिने नं यक्वसिनं यय्कल ।
खँल्हाबल्हाया झ्वलय् अन्तर्राष्ट्रिय व नेपाल गुणस्तरयागु चिं थौंतक नं कयामदी छाय् धकाः न्यनागु न्ह्यसःयात कयाः वय्कलं धयादिल, जिं थःगु उत्पादन अन्तर्राष्ट्रिय मापदण्डकथं Azo Free यानाः उत्पादन यानागु दु । Azo Free मजूगु उत्पादन युरोप व अमेरिकाय् दुहांवय्के बीमखु । Azo Free मजूगु रंगं स्वास्थ्ययात थुलि बांमलाक असर याइ कि थुकिं क्यान्सर तक नं जुइफु । अथे जूगुलिं जिमिसं पुलांगु प्रविधि मछ्यःसे न्हूगु प्रविधि दुथ्याकाः रंग छपाइया ज्याखँ न्ह्याकाच्वनागु दु । झीसं यानागु ज्याय् थःम्हं सीकसीकं मखुगु ज्या छता यायेमज्यू । थौं थनया उत्पादनपाखें नेपाः देय्या थःगु मौलिक, सांस्कृतिक सम्पदा हलिमय् झःझः धायेक ब्वयेफत, थःगु व्यवसाय बांलाक न्ह्याकेफत थुगु खँय् जितः सन्तुष्टि जू । थ्वहे जिगु लक्ष्य नं खः ।
खँल्हाबल्हाया झ्वलय् थौंतक सरकारपाखें छुं ग्वाहालि जूगु दु कि मदु धयागु न्ह्यसःयात कयाः वय्कलं जिं सरकारी नीतिपाखें छुं ग्वाहालि दइगुकथं ताय्काः व्यवसाय न्ह्याकागु नं मखु । जितः छुं ग्वाहालि जुइगुकथं नीति नं दुगु खनेमदु । अय्सां थःम्हं यानागु ज्यां थःत आत्मसन्तुष्टि दुगु खँ कनादिल ।
थःपिन्त वःगु समस्या व मर्काया खँ कनादीगु झ्वलय् नेपाः देय् दुने राजनीतिक अस्थिरताया झ्वलय् ४००/५०० मनूतय्त लजगाः बीफुगु थःगु व्यवसाय चौपट जूगु खँ कनादिल । थज्याःगु चौपट अवस्थापाखें छिसं गुकथं थःगु व्यवसाययात स्थिर यायेत ताःलाःगु खः ? न्ह्यसःया खँय् वय्कलं धयादिल, थःगु मौलिकता नेपाः देय्या कापःपाखें डिजाइन यानाः जुजु वयर्स व Hemp यागु डिजाइनयात राष्ट्रिय व अन्तर्राष्ट्रिय रुपं म्हसीकेगुकथं न्ह्यांवनागु खः । थुलि यायेमफुगु जूसा थ्व व्यवसाय नं चौपट जुइधुंकूगु जुइ । वय्कलं नेपाः देय् दुने तःजिगुकथं औद्योगिक व्यवसाय स्वयाः SME कथं थःगु मौलिक प्राचीन संस्कृति सम्पदा न्ह्याकेगु यानाः वनेगुलिइ नेपाल सरकारं तिबः ब्यूगु जूसा यक्व ह्वःताः चूलाकेफु धयागु छगू दृष्टान्त खः, Juju Wears, Karuna Natural Wears । थ्व निगू ब्राण्डयात व्यवसायकथं Shraman Apparels मार्फत न्ह्याकागु खः ।
झीसं झीगु निंतिं झीगु हे डिजाइनय् उत्पादन यानागु खः, जुजु वयर्सया नामं । तर झीथाय् बाहेक अमेरिका, युरोपय् नं बांलाक हे वनाच्वंगु दु । जुजु वयर्स न्ह्याकेधुंकाः जितः तसकं उत्साह बढेजुल । थुकी तसकं सरल, झीगु जःखः दुगु हरेक खँ आर्टय् हिला । वसः तयार यायेगु झ्वलय् जि थः नं कलाया स्नातक डिग्री अध्ययन यानागु जुयाः थुकथं वसः व आर्ट मिक्स जुल । थुकिया विशेषता धइगु हे प्रिण्ट खः । थ्वहे प्रिण्टयात स्वयाः यक्वसिनं यय्कल, न्ह्याइपु ताय्कल । थुकिया निंतिं उत्पादन, प्रिण्ट, आर्ट याइपिनिगु टिम हे दु । थुकी सकसिगुं उलि हे मेहनत व योगदान दु । थुकी नेवाःतय्गु संस्कृति, सम्पदानापं देय्या म्हसीका दइगु किपा प्रिण्ट याना । झीथाय् दुगु अप्वः धइथें डिजाइन ला नेवाः संकृति सम्पदा सम्बन्धी हे दु । मेगु हिमाल, पहाड, तराईपिनिगु म्हसीका दइगुकथंया दु धाःसा गुलिं गुलिं अन्तर्राष्ट्रिय नं दु । अले लंया क्वालिटी बांलाकाः नेपालय् नं अन्तर्राष्ट्रिय क्वालिटीया लं उत्पादन यायेफु धइगु परिचय बियाच्वनागु दु ।
खँल्हाबल्हाया झ्वलय् श्रमण एपरेल्स न्ह्याकेगु खँय् थौंकन्हय् परिस्थितियात ल्वयेक थः काय् भाजु श्रमण शाक्यं थुगु उद्योगयात बांलाक ई बियाः न्ह्याकावयाच्वंगु खँ कनादिल । वय्कलं अष्ट्रेलियाया Wollongong University पाखें Business Management अध्ययन यानाः Marketing specialist याःगु खः । अनं लिहांवयेवं थुगु व्यवसायया प्रवन्ध निर्देशक जुयाः थःम्हेसिनं ब्वनागु ज्ञानयात थुगु उद्योगय् छ्यलाच्वंगु दु । गुकिं यानाः व्यवसाय ताःलाकेगुलिइ माःगुकथं तिबः जुयाच्वंगु खँ वय्कलं कनादिल । वय्कलं न्ह्यःने धयादिल, थौंकन्हय् थःम्हं वं यानाच्वंगु ज्यायात नीतिगतरुपं व सल्लाहकारकथं भूमिका म्हिताच्वनागु दु ।
थौंकन्हय् प्यंगू थासय् शो–रुम संचालन यानाच्वनागु दु धाःसा थनं श्रमिक व सेल्समेननापं १५० म्हेसित लजगाः बियाच्वनागु खँ वय्कलं कनादिल । दकले लिपा वय्कलं धयादिल, दकसिबे तःधंगु पूँजी धइगु ग्राहकतय्गु विश्वास व योगदान खः । थ्व विश्वास वय्कःपिन्सं यानाच्वनादीगु दु । थ्व सदां दयाच्वनि धइगु भलसा कासें ग्राहकपिन्त न्हूगु, बांलाःगु, झीगु मौलिक म्हसीका दइगु, स्वास्थ्यय् छुं नं असर मजुइगुकथंया वसः न्ह्यब्वयेगु व ग्राहकया सन्तुष्टिया निंतिं जिमिगु पाखें न्ह्याबलें कुतः जुयाच्वनिगु प्रतिवद्धता वय्कलं प्वंकादिल ।
