येँ/बागमती प्रदेशस्तरीय नेपालभाषा व तामाङ भाषा इसिडी तगिंनिसें प्लस टू तगिंतक अध्यापन याकेगु बिषयलय् शिक्षा मन्त्री महावीर पुनयात ध्यानाकर्षण याकूगु दु । शिक्षामन्त्री पुनयात सुकुन्दा साहित्य पालाया नायः प्रशान्त डंगोल, सुकुन्दा साहित्य पालाया दुजः सुमितदास रञ्जितकार, नेवाः विद्यार्थी यूनियनया नायः रिदेन महर्जनपिन्सं संविधानं बियातःगु मातृभाषासम्बन्धी अधिकारंं ७ गू प्रदेशय् च्वंपिं जनतात मांभाय् छ्यलेगुपाखें बन्चित जुयाच्वगु खँ स्मरण याकूगु खः । मनोवैज्ञानिक रूपं मातृभाषा शिक्षा बिल धाःसा ब्वनामिपिन्सं ३० निसें ५० प्रतिशततक याकनं सय्काकाइ, ४० निसें ६० प्रतिशततक अप्वः सय्काकाइ, मस्तय्त थःथःगु मातृभाषां शिक्षा बिल धाःसा स्मरण शक्ति २५ निसें ४० प्रतिशततक अप्वः जुइ धइगु खँ प्रमाणित जुइधुंकूगु लिसें ड्रप आउट दर २० निसें ३० प्रतिशत म्हो जुइगु धकाः नं प्रमाणित जूगु खँ नं मन्त्री पुनयात न्ह्यब्वःगु खः ।
थौंकन्हे स्थानीय मातृभाषा संरक्षण शिक्षा नीति अनुरुप येँ महानगर पालिकाय् छगू तगिंनिसें च्यागू तगिंतक अध्यापन जुयाच्वंगु दु । टोखा नगरपालिकाय् वडा २ व ३ या ब्वनेकुथिइ जक छगू तगिंनिसें स्वंगू तगिंतक नेपालभाषा अध्यापन जुयाच्वंगु दु । यल महानगरपालिकाय् छगू तगिंनिसें प्यंगू तगिंतक शुरु जूगु दु । किपू नगरपालिकाय् छगू तगिंनिसें खुगू तगिंतक कक्षा जुयाच्वंगु दुसा शंखरापुर नगरपालिकाय् छगू तगिंनिसें नेपालभाषा कक्षा न्ह्यानाच्वंगु दु । थुकथं हे स्वनिगःया न्यंकभनं निजी व सरकारी ब्वनेकुथिइ नेपाभाषा विषय दुथ्याकेमाःगु खँय् बःबियादिल ।
