शम्भुराम श्रेष्ठया १०४ क्वःगु लुमन्ति मुँज्या

यल/का. शम्भुराम श्रेष्ठ स्मृति संस्थाया ग्वसालय् लोकतान्त्रिक व कम्युनिष्ट आन्दोलनया वरिष्ठ नेता का. शम्भुराम श्रेष्ठया १०४ क्वःगु जन्मजयन्तीया झ्वलय् लुमन्ति मुँज्या जुल । संस्थाया नायः गोर्की श्रेष्ठया सभापतित्वय् जूगु उगु ज्याझ्वलय् नेवाः न्ह्यलुवाः डा. महेशमान श्रेष्ठं राष्ट्रिय स्वाधीनता धइगु तसकं तःधंगु खँ खः । उकिं राष्ट्रिय स्वतन्त्रताया निंतिं शम्भुराम श्रेष्ठं बियादीगु बांलाःगु बिचाः व खँयात लुमंकाः झी भ्रष्टाचार, देशघाती, नश्लवादीया विरोधी जुइमाः । शम्भुरामं देय् व जनताया निंतिं बियादीगु बांलाःगु बिचाः व खँयात व्यवहारय् छ्यलायंकेगु झी सकसिगुं जिम्मेवारी खः उकिं झी गुलिनं थन मुनाच्वना सकसिनं व्यवहारय् छ्यल धाःसा छुं नं छुं उपलब्धी जुइगु खँ धयादिल ।
ज्याझ्वलय् बागमती प्रदेशया दुजः हरिप्रभा खड्गी श्रेष्ठं राजनीति धइगु देय् व जनताया हितया निंतिं यायेगु खः उकिं राजनीति याइपिन्सं सकसिगुं बिचाःयात कदर यायेमाः । थौंकन्हे पार्टीइ दुने नं यक्व बांमलाःगु ज्याखँ जुयाच्वंगुयात सच्चापिं नेता कार्यकर्तातय्सं पार्टी त्वःताः मखु पार्टीइ दुने हे च्वनाः विरोध व संघर्ष यानाच्वनेमाःगु खँ धासें लोकतान्त्रिक आन्दोलनया वरिष्ठ नेता शम्भुराम श्रेष्ठं बियादीगु बिचाःयात व्यापक यानाः वनेमाःगु खँय् बःबियादिल । नापं वय्कःया बारे प्रकाशन याये ल्यंदनिगु सपूmयात प्रकाशन यायेगु ज्याय् थःम्हं नं फुगुकथं ग्वाहालि यायेगु बचं बियादिल ।
अथे हे क्रन्तिकारी कम्युनिष्ट पार्टीया नेता सीताराम तामांगं शम्भुरामनापं थःगु स्वापूया खँ न्ह्यथँसें थःगु ‘नेपालय् जनजाति समस्या’ सपूmया भूमिका च्वकाबलय् वय्कलं खुुला ई कयाः च्वयादिल । अले सपूm पिदंबलय् जिगु च्वसा स्वयां वय्कःया भूमिका तसकं बांलात व महत्वपूर्ण जुल । वय्कलं भूमिकाय् उबलय् हे आदिवासी जनजातियात स्वायत्तता माः धइगु बिचाः लगायतया खँत दुथ्याकाः च्वयादीगु खँ धयादिल । नेपालभाषा केन्द्रीय विभागया पूर्व प्रमुख तुल्सीलाल सिंहं शम्भुराम देशभक्त, क्रान्तिकारी व्यक्तित्वया रुपय् थःम्हं म्हस्यूगु खँ धासें वय्कलं नेपाःयात साम्राज्यवादी व विस्तारवादीपाखें मुक्त यायेगुलिइ तःधंगु योगदान बियादीगु खँ न्ह्यथनादिल ।
नुगःखँ तयेगु झ्वलय् शम्भुरामया म्ह्याय् मधु श्रेष्ठं जिमि बाःनं १८ दँया युवा अवस्थाय् हे राजनीतिइ पलाः न्ह्याकादीगु खः । व इलय् राजनीति यायेगु धइगु थौंथें अःपु मजू, मिँइ पलाः तयेगु थें खः धासें वय्कःया बिचाःकथं एकिकृत कम्युनिष्ट पार्टीया अवधारणा, असंलग्न परराष्ट्र नीति, स्वाभिमानी राष्ट्रियता, प्रगतिशील विचारधारा, वैज्ञानिक व भौतिकवादी, जाति विभेद, वैदेशिक अनुदान थःगु राष्ट्रया हितय् जुइमाः, राम्राज्यवादी व विस्तारवादीपाखें तसकं सतर्क जुइमाः धइगु वय्कःया बिचाः थौं वयाः झन् हे सान्दर्भिक जूगु खँ धयादिल ।
सभापतित्वया थासं न्वँवासें गोर्की श्रेष्ठं शम्भुरामया विचारय् देशय् छगू जातियात जक अधिकार मखु दक्व जाति मिलेजुयाः सकसितं समान अधिकार दयेमाः धइगु खः । शम्भुराम छम्ह सक्षम व सकसितं बांलाक खँ थुइकाबीफुम्ह दूरदर्शी नेता खः, वय्कलं च्वयादीगु सफू ‘मेरा राजनीतिक जीवनका संस्मरणहरु’ आः फुइधुंकूगुलिं हाकनं छापेयायेगु व वय्कःया संस्मरण सफू दिनाच्वंगुयात याकनं प्रकाशन यायेगु खँ धयादिल ।
संस्थाया सचिव कृष्णबहादुर घःजुं न्ह्याकादीगु उगु ज्याझ्वलय् संस्थाया उपाध्यक्ष सुमन श्रेष्ठं लसकुस न्वचु व संस्थाया कोषाध्यक्ष अर्जुन श्रेष्ठं सुभाय् न्वचु बियादीगु खः ।