येँ/नेप्लीज् फेशन होमया ग्वसालय् व फाइट फर लाइफया सह–ग्वसालय् जूगु ‘मिस लिटिल नेवाः ११४५’ या उपाधि यलया सुरवी वज्राचार्यं त्याकल । वय्कलं उपाधिनापं ताज, नगद २५ हजार व थीथी सिरपा नं त्याकल । १९ म्हेसिनं ब्वति काःगु उगु प्रतियोगिताय् येँ मैतीदेवीया कृष्टिना महर्जन फस्र्ट रनर अपया नापं मिस ट्यालेन्ट व कुलेश्वरया रिपान्सी श्रेष्ठ सेकेन्ड रनर अप जुल । वय्कःपिन्सं छसिकथं १५ हजार व १० हजार नगदनापं ताज व थीथी उपहार नं त्याकल ।
प्रतियोगिताय् अर्शिया महर्जन मिस ट्यालेन्ट फष्र्ट रनर अप, प्रिन्सिका शाही मिस ट्यालेन्ट सेकेण्ड रनर अप, लिडिया महर्जन बेष्ट नेपालभाषा, रोजलिन शाक्य बेष्ट ड्रेस व देजला शाक्यं सोसल वेलफेयर एम्बासेडर चिफया उपाधि त्याकल । अथे हे सहिना शाक्य सोसल वेलफेयर एम्बासेडर फष्र्ट रनर अप, बिदिशा महर्जन सेकेण्ड रनर अप, आन्या महर्जन मिस डिसिप्लिन, सचिका महर्जन मिस पब्लिक च्वाइस, श्रीषा श्रेष्ठ मिस कल्चर, आरग्या महर्जन मिस कन्फिडेन्टनापं बेष्ट स्किन, क्रिष्टिना खड्गी मिस पर्सनालिटीनापं मिस फ्रेन्डसिप, सपूm वज्राचार्य मिस इनोसेन्टनापं मिस फोटोजेनिक, निभाः डंगोल बेष्ट हेयरनापं मिस क्युट, संस्था मानन्धर बेष्ट स्माइल व श्रेया बलामीं मिस चार्मिङया उपाधि त्याकल ।
लायन्स क्लब इन्टरनेशनल ३२५ या पाष्ट डिष्ट्रिक्ट गभर्नर मनिश्रीरत्न वज्राचार्य मू निर्णायक जुयादीगु उगु प्रतियोगिताय् अधिवक्ता लक्ष्यमान महर्जन, डा. शिक्षिता श्रेष्ठ, नमुना फेसन कलेजया भाइस प्रिन्सिपल जिवेश्वरलाल श्रेष्ठ, नेपालभाषा प्रशिक्षक राजु नापित व ज्यापु समाज यलया नायः शान्तमान महर्जन निर्णायक जुयादीगु खः । नेवाः समुदायया नेपालभाषा, लिपि, कला व संस्कृति म्वाकातयेत मस्तय्त अभिप्रेरित यायेगु उद्देश्यं १५ दँ न्ह्यःनिसें थ्व ज्याझ्वः न्ह्याकाच्वनागु खँ ग्वसाः खलःया नायः हेमा मानन्धरं धयादिल ।
