यल/पूर्व संस्कृति, पर्यटन व नागरिक उड्डयन मन्त्री व यल नगरपालिकाया पूर्व नगर प्रमुख, समाजसेवी बुद्धिराज बज्राचार्य ८९ दँय् श्रावण ३ गते शिक्षण अस्पताल महाराजगञ्जय् वास याकेगु झ्वलय् मन्त । वय्कलं २०२७ सालय् तत्कालीन ललितपुर पञ्चायत, वडा नं. १७ या वडाध्यक्ष जुयाः ज्या यानादीगु खःसा २०३२, ०३९ व ०४३ सालय् प्रधानपञ्च जुयाः ज्या यानादीगु खः । अथे हे २०४६ सालय् प्रजातन्त्र वयेधुंकाः २०५४ व ०५९ सालय् यल उपमहानगरपालिकाया प्रमुख जुयाः ज्या यानादीगु खः ।
थ्वहे झ्वलय् यल महानगरपालिकां छगू विज्ञप्ति पिकयाः वय्कः मदुगुलिं अपूरणीय क्षति जूगु धासें हार्दिक श्रद्धाञ्जली देछाःगु दु । विज्ञप्तिइ थीथी इलय् बज्राचार्यं यल नगरया नगर प्रमुखया जिम्मेवारीइ च्वनाः नगरया विकासय् महत्वपूर्ण योगदान बियादीगु खँ न्ह्यथनातःगु दु । अथे हे बज्राचार्य मदुगुलिं महानगरं सूचना प्रकाशित यासें श्रावण ४ गते शोक बिदा ब्यूगु खः ।
थीथी संघ, संस्थाय् सल्लाहकार जुयाः ज्या यानाच्वनादीम्ह वय्कः लिपांगु इलय् ललितपुर विकासको लागि समाज नीस्वना कला, संस्कृति, बहाबही, देय्गः, पाटी संरक्षणया निंतिं ज्या यानाच्वनादीम्ह खः । वय्कःयात अन्तिम श्रदाजलि देछायेगु निंतिं पुच्वया अक्षेश्वर महाविहारय् १२ ताःईनिसें २ ताःईतक तःगु खःसा अन्तिम संस्कार नख्खुया यप्पा दीपय् जूगु खः ।
