यल/बाडेगामय्च्वंगु ज्येष्ठ नागरिक दिवा सेवा केन्द्रया १३ क्वःगु दँमुँज्या छगू ज्याझ्वःया दथुइ मूपाहां गोदावरी नगरपालिकाया उपप्रमुख मुना अधिकारीं उलेज्या यानादिल । उलेज्या यासें वय्कलं झीत जन्म ब्यूपिं मांबाः धइपिं द्यः खः धासें वय्कःपिनिगु आदर सेवा यायेगु द्यः पुजा यायेगु व द्यः लय्ताय्केगु खः धयादिल । वय्कलं ज्येष्ठ नागरिक दिवा सेवा केन्द्रपाखें जुयाच्वंगु ज्यां ज्येष्ठ नागरिकपिन्त नापलायेगु, खँल्हायेगु वातावरण दयाः याकःचाया अनुभव मयासे न्ह्याइपुकेगु ह्वःताः चूलाकाब्यूगु खँ धयादिल ।
केन्द्रया अध्यक्ष जोगबहादुर महर्जनया सभापतित्वय् जूगु उगु ज्याझ्वलय् पाहांकथं झायादीम्ह गोदावरी नगारपालिका वडा ल्याः १४ या वडा अध्यक्ष निरोज वज्राचार्यंं थः मांबाःपिं बुराबुरि जुइधुंकाः सेवा यायेगु मस्तय्गु दायित्व व कत्र्तव्य खः धासें वय्कःपिनिगु सेवा यायेगु धइगु हे द्यःया पुजा यायेगु खः धयादिल । अथे हे समाजसेवी मदनकुमार श्रेष्ठं ज्येष्ठ नागरिकपिनिगु सेवा यायेगु हे तःधंगु धर्म व पुण्यया ज्या खः धासें संस्थाया अक्षयकोष नीस्वनेत १० लाख तका व वृद्धाश्रम भवन दय्केगु निंतिं १३ लाख तका ग्वाहालि यानादिल । ज्याझ्वलय् संस्थाया वार्षिक प्रतिवेदन व आर्थिक प्रतिवेदन न्ह्यब्वःगु खःसा केयर एण्ड डेभलपमेन्ट अर्गनाइजरया ग्वसालय् ज्येष्ठ नागरिकपिनिगु स्वास्थ्य जाँच यायेगु निंतिं स्वास्थ्य शिविर नं न्ह्याकूगु खः ।
