किपू/नेपाःया परम्परागत सिद्धहस्त मूर्धन्य कलाकार क्रोधकला शिरोमणि प्राज्ञ कालु कुम्हाःया सिर्जना व व्यक्तित्व दुथ्याःगु म्यें ‘शान्त स्वभाव का … ’ या म्यूजिक भिडियो किपुलिइ जूगु छगू ज्याझ्वःया दथुइ पितब्वज्या जुल । क्रोधकला शिरोमणि फाउण्डेशनया निर्माणय् नेपाल ललितकला प्रज्ञा प्रतिष्ठान, नेपाल हस्तकला महासंघ व हाम्रो पात्रोया सहकार्यय् थुगु म्यूजिक भिडियो तयार जूगु खः ।
नरेन्द्र प्यासीया संगीत व सलय् तयार जूगु थुगु म्येँ प्रेम महर्जनं च्वयादीगु खःसा म्यूजिक एरेन्ज सुमन कपालीं यानादीगु खः । थुगु म्यूजिक भिडियोया निर्देशन व छायांकन लुजः सिंहं यानादीगु खः । ज्याझ्वलय् कीर्तिपुर नगरपालिकाया प्रमुख कृष्णमान डंगोलं प्राज्ञ कुम्हाःयात हंगु उगु ज्याझ्वलय् फाउण्डेशनया नायः राकेश अवाले लगायत पाहाँपिन्सं कुम्हाःया व्यक्तिव व योगदानया बारे न्वंवानादीगु खः ।
नेपाःया परम्परागत धातु मूर्तिकलाया माध्यमं नेपाः देय्यात अन्तर्राष्ट्रिय जगतय् म्हसिकेगुलि तःधंगु योगदान बियादीम्ह प्राज्ञ कुम्हाः ९३ दँ क्यंगु लसताय् थुगु म्युजिक भिडियो पितब्वज्या जूगु खः । थुगु ज्याझ्वः म्येँहालामि रिता महर्जनं न्ह्याकादीगु खः ।
