किपाः रविन्द्र बाराही
यल/कन्हे नेपाल सम्बत् ११४६ सिल्लाथ्व द्वादशी, माघ १६ गते शुक्रबाः हौगः त्वालं भिन्द्यःपूजा नगर परिक्रमा जुइत्यंगु दु । हौगः भिन्द्यःपूजा परिक्रमा व्यवस्थापन समितिं पत्रकार सम्मेलन यासें थुगु खँया जानकारी व्यूगु खः । भिन्द्यःपूजा कन्हे सुथय् १० ताःइलय् न्ह्याइ सा ४ ताःइलय् तकया दुने नगरपरिक्रमा क्वचायेधुंकीगु व अनंलिपा क्वन्ति त्वाःयात मेगु दँया भिन्द्यःपूजा पाःब्व लःल्हायेगु ज्या जुइगु खँ नं धाःगु दु । हौगः त्वालं न्ह्याइगु जूसां थनया जःखः दुगु न्याम्ह भिन्द्यः हौगः भिन्द्यः, हाँचु भिन्द्यः, विश्वकर्मा भिन्द्यः, नःबहाः भिन्द्यः व इटाछेँ भिन्द्यःया मंकाः ग्वसालय् नगरपरिक्रमा यायेगु ज्या जुइगु जानकारी नं बिल । सम्मेलनय् व्यूगु प्रेस विज्ञप्तिइ सल्लाहकार, कार्यसमिति, कार्य व्यवस्थापन समिति, उपसमितिनापं अनुमानित आर्थिक विवरणया बारे नं न्ह्यब्वयातःगु दु ।
समितिया नायः राजु ताम्रकारया सभापतित्वय् जूगु उगु ज्याझ्वलय् बागमती प्रदेशया मूख्यमन्त्री इन्द्रबहादुर बानियाँ मूपाहाँकथं झाःगु खःसा विशषपाहाँकथं बागमती प्रदेश सभाया दुजः रामकृष्ण चित्रकार, १६ नं वडाया वडाअध्यक्ष निर्मलरत्न शाक्य, नेपालभाषा मंकाः खलः यलया सल्लाहकार प्रेमकृष्ण महर्जन, समितया सल्लाहकार धर्मकृष्ण ताम्रकारं आसन ग्रहण यानादीगु खः । समितिया छयाञ्जे पुष्पराज महर्जनं न्हयाकादीगु उगु ज्याझ्वलय् समितिया न्वकु ज्ञानलाल महर्जनं प्रेस विज्ञप्ति ब्वनाः न्यंकादीगु खः ।
