येँ/येँ महानगरपालिका २७ वडाय् दुने लाःगु असंया यिताचपाःलिसें थीथी सम्पदा पुनःनिर्माण क्वचाःगु लसताय् सोमबाः जूगु छगू ज्याझ्वःया दथुइ येँमनपाया प्रवक्तालिसें १७ वडाया वडा अध्यक्ष नवीन मानन्धर, २७ वडाया वडा अध्यक्ष योगेशकुमार खड्गी, सम्पदा व पर्यटन समितिया कजिनापं ८ वडाया वडा अध्यक्ष आशामान संगत व वातावरण समितिया कजिनापं १२ वडाया वडा अध्यक्ष वालकृष्ण महर्जनं मंकाःकथं उलेज्या यानादिल । यिताचपाः सतःनापं गणेश देगः, नारायण देगः, उमा महेश्वर देगः, दबू व भ्वताहितिइच्वंगु कलश ध्वाखाया उलेज्या जूगु खः ।
उलेज्यालिपा असंया दबुलिइ जूगु ज्याझ्वलय् प्रवक्ता मानन्धरं असं येँया पहिचान खः धासें असंया प्राचीनता व सांस्कृतिक म्हसीका म्वाकातयेगु निंतिं महानगरं याःगु लगानी महत्वपूर्ण जूगु धयादिल । सभापतिया थासं न्वंवासें अध्यक्ष खड्गीं यिताचपाः पुनःनिर्माणं असंया ख्वाः चकंगु खँ धासें थुगु चपाः झी पूर्खाया नासो, सांस्कृतिक महत्वंजाःगु नापं व इलय् पिने विदेशं येँय् दुहांवइबलय् थुगु चपालय् छुं दिं च्वनेधुंकाः भ्वताहितिइ म्वःल्हुयाःतिनि छेँय् लिहांवनेगुकथं क्वारेन्टाइनया रुपय् व इलय् हे छ्यलाच्वंगु खँ धयादिल । झीगु मौलिक, सांस्कृतिक सम्पदा संस्कृति हे झीगु पहिचान खः धासें पूर्खाया थ्व नासोयात संरक्षण सम्वद्र्धन यायेत वडा न्ह्याबलें तयार जूगु खँ वय्कलं धयादिल । यिताचपाः २ करोड ८४ लाख २९ हजार ४५६ तकाया लागतय् पुनःनिर्माण क्वचाःगु जानकारी ब्यूगु खः ।
