विराटया ख्वीप्यक्वःगु साहित्य सम्मेलन

 ख्वप/विराट नेपालभाषा साहित्य सम्मेलन गुथिया ग्वसालय् ख्वीप्यक्वःगु विराट नेपालभाषा साहित्य सम्मेलन ज्याझ्वःया उलेज्या मूपाहां संस्कृतिविद् डा. चुन्दा वज्राचार्यं यानादिल । गुथिया नायः महेन्द्रगोपाल कर्माचार्यया सभापतित्वय् जूगु उगु ज्याझ्वलय् थुगु दँया पूर्ण वैद्य सिरपा साहित्यकार मोतिलक्ष्मी शाक्ययात नगद १ लाखसहित दसिपौ मूपाहां वज्राचार्यं लःल्हानादिल ।

 स्वनिगःया नीम्ह साहित्यकारपिन्सं थःथःगु रचना वाचन यानादीगु उगु सम्मेलनय् च्वखँय् न्हाप ओमनरहरि श्रेष्ठ, बाखनय् न्हाप लक्ष्मीचन्द्र वज्राचार्य, ल्यू ज्ञानीराजा मानन्धर व चिनाखँय् न्हाप लुमन्ति चित्रकार, ल्यू मिमला शर्मा व लियांल्यू रामेश्वर श्रेष्ठ ‘मिश्रण’ लाःगु खः । सिरपा लाःपिन्त नगदनापं दसिपौ लःल्हाःगु खः । अथे हे एसईईइ नेपालभाषा कयाः अप्वः ल्याः हःम्हेसित बीगु सिरपा थुगुसी जगतसुन्दर ब्वनेकुथिया फिदा खातुनयात लःल्हात । गुथिया छयाञ्जे प्रदिपरत्न शाक्यं न्ह्याकादीगु उगु ज्याझ्वलय् बाखंच्वमि श्याम आशां च्वयादीगु चिबाखं मुना सफू ‘म्हूचिंगु ल्हाः’ व मदुम्ह साहित्यकार त्रिरत्न शाक्यया लुमन्ति ल्याःकथं गुथिया ख्वाःपौ ‘ह्याउँबाला’ नं विमोचन जूगु खः । ज्याझ्वलय् म्येँहालामिपिं सत्यनारायण मानन्धर, हरिसुन्दर लाखे व प्रदिप शाक्यं म्ये हालाः न्यंकादीगु खः ।