• फिरोज राजोपाध्याय
नेपाल प्रिमियर लिगया निक्वःगु संस्करण भव्य रुपं क्वचाःगु दु । वंगु मंसिरया १ गतेनिसें २७ गतेतक संचालन जूगु लिगया सिरपा लुम्बिनी लायन्सं त्याकल । लुम्बिनी लायन्सं सुदूरपश्चिम रोयल्सयात ६ विकेटं बुकूगु खः । कीर्तिपुरया त्रिवि रंगशालाय् फ्लडलाइटय् जूगु फाइनलया टस सुदूरपश्चिमया नायः दीपेन्द्रसिंह ऐरीं त्याकल ।
दीपेन्द्रं ब्याटिङ यायेगु निर्णय काल । तर, वय्कःया थ्व निर्णय गलत साबित जुल । वय्कःया टिमं ८५ रन जक दय्केफत । थुलि रन दय्काः त्याकेत धाःसा चमत्कार हे जुइमाल । अन छुं नं चमत्कार मजू व लुम्बिनीं ९ ओभरय् लक्ष्य कयाः सिरपा नं त्याकल ।
थ्वलिसें सुदूरपश्चिमया टिम फाइनलय् हानं छक्वः हिस्स जुइमाल । वंगु दँय् जूगु न्हापांगु संस्करणया नेपाल प्रिमियर लिगय् नं सुदूरपश्चिम बूगु खः । उबलय् थ्व टिम जनकपुर बोल्ट्सलिसे बूगु खः । जबकि लिग चरण कासाय् सुदूरपश्चिमं जनकपुरयात ५१ रनय् अलआउट याःगु खः ।
न्हापांगु लिगय् च्याम्पियन जूगु टिम जनकपुर थुगुसी अन्तिम टिम जुल । जनकपुरं न्हय्गू कासा म्हिताः छगू कासाय् जक त्याकेफत । तर, संजोग थथे जुल कि न्हापांगु लिगय् अन्तिमय् लाःगु लुम्बिनी धाःसा थुगुसी च्याम्पियन जुल ।
थ्व सिजनय् विदेशया महान खेलाडीपिंमध्ये दक्षिण अफ्रिकाया फाफ डु प्लेसिस व इंग्ल्यान्डया जेसन रोय मुख्य खः । थुपिं निम्ह कासामि क्रिकेट जगतया चर्चित व सफल कासामि खः । पूर्व क्रिकेटर पारस खड्कां धाःकथं मेगु सिजनया नेपाल प्रिमियर लिगय् विदेशया दिग्गज खेलाडी हयेगु कोशिस जारी यायेगु जुइ ।
थ्व लिगय् रेकर्डत नं निर्धारण जुल । विराटनगर किंग्सं पोखरा एभेन्जर्सविरुद्ध २२० रन दय्कूगु दकले अप्वः स्कोर खः । विराटनगर किंग्सया मार्टिन गप्टिल व लोकेश बमं पोखरा एभेन्जर्सविरुद्ध हे रेकर्ड पार्टनरसिप यात । इमिसं १३२ रनया पार्टनरसिप याःगु खः ।
अथे हे कर्णाली याक्सया मार्क वाटं लुम्बिनी लायन्सविरुद्ध ११४ रन दय्काः लिगय् व्यक्तिगतय् अप्वः रन दय्कूगु रेकर्ड तल । तर, लिगय् यक्व रन धाःसाः पोखरा एभेन्जर्सया एडाम रोसिंगटनं छगू सतकलिसें कूल ३२३ रन दय्काः रेकर्ड तल ।
नेपाली कासामिइ धाःसा वंगु लिगय् थें थुगुसी नं लुम्बिनी लायन्सया नायः रोहित पौडेलं अप्वः रन दय्कल । वय्कलं न्हापांगु लिगय् २७९ रन दय्कूगु खः । यक्व विकेट काःम्ह बलर स्वम्ह दु । सुदूरपश्चिमया अविनाश बोहरा, विराटनगरया कप्तान सन्दीप लामिछाने व लुम्बिनीया शेर मल्लं म्हतिम्हतिं १७ विकेट काःगु खः । थुपिं स्वम्हं हे नेपाली कासामि खः । वंगु संस्करणय् नं यक्व विकेट ल्याः १७ हे काःगु खः । उबलय् स्कट कुगेलिन व ललित राजवंशीं काःगु खः ।
संक्षेपय् नगद सिरपा
– फाइनलय् त्याकूगु टिम लुम्बिनी लायन्सं १ करोड १० लाख नगद काल ।
– फाइनलय् बूगु टिम सुदूरपश्चिम रोयल्सं ५१ लाख नगद काल ।
– स्वंगूगु थासय् लाःगु टिम विराटनगर किंग्सं २५ लाख नगद काल ।
– प्यंगूगु थासय् लाःगु टिम काठमाडौं गोर्खाजं १५ लाख नगद काल ।
– नेपाली कासामिइ सर्वोत्कृष्ट जूम्ह रोहित पौडेलं ओमोडा कार सिरपा त्याकल । अथे हे सर्वोत्कृष्ट ब्याटर जुयाः वय्कलं पल्सर बाइक नं ल्हाःतिइ लाकल ।
– लिगय् सर्वोत्कृष्ट कासामि जुयाः लुम्बिनीया रुबेन ट्रम्पलमेनं ५ लाख नगद खल्तीइ तल । वय्कः नामिबियाया क्रिकेटर खः ।
– सर्वोत्कृष्ट बलर जुयाः सन्दीप लामिछानें पल्सर बाइक त्याकल ।
– सर्वोत्कृष्ट उदीयमान कासामि जुयाः शेर मल्लं नं पल्सर बाइक त्याकल ।
