साफ मिसा यू–२० च्याम्पियनसिपय् ग्वसाः खलःया टिम बंगलादेशं सिरपा त्याकूगु दु । सोमबार जूगु अन्तिम कासाय् नेपाःयात
४–० गोलं बुकाः बंगलादेश न्याक्वःतक च्याम्पियन जुइत ताःलाःगु दु ।
आःतक थुगु कासाया सिरपा बंगलादेश व भारतं जक त्याकूगु दु । भारत व बंगलादेशं मंकाःकथं छगू संस्करणय् उपाधि त्याकूगु खः । भारतं मुक्कं निक्वः उपाधि त्याकूगु दु ।
नेपाः स्वक्वःतक पटक उपविजेता जूगु खः । थ्व स्वयां न्ह्यः सन् २०१८ व २०२३ य् नेपालं उपाधि त्याकेमफुगु खःसा निगुलिं कासाय् बंगलादेशलिसे बूगु खः । स्वक्वःतक स्वंगूगु थासय् लाःगु दु ।
बंगलादेशया बसुन्धरा किंग्स रंगशालाय् जूगु कासाया सुरुइ हे घरेलु टिम बंगलादेशं अग्रता काःगु खः । कासाया च्यागूगु मिनेटय् काउन्टर आक्रमणय् नेपाःया गोलकिपर सुजाता तामाङयात छलेयानाः सागोरिकां गोल याःगु खः ।
बंगलादेशं आक्रमणकारी कासाय् ध्यान ब्यूगु खः । न्हापांगु हाफय् अग्रता कायेत छुं तःधंगु अवसर त्वःफिकल । मेखे नेपालं धाःसा गोल यायेत तःधंगु चालतकं यायेमफुत । न्हापांगु हाफय् बंगलादेश १–० गोलं अग्रता काःगु खः । ल्यू हाफ सुरु जूगु खुगूगु मिनेटय् नेपालं थःगु निगूगु गोल आत्मसात यात । मुन्की अख्तारया सटीक पासय् सागोरिकां गोल याःगु खः । बंगलादेश २–० गोलं अग्रता काःगु खः ।
कासाया ५८ औं मिनेटय् सागोरिकां ह्याट्रिक यात । ताःहाकःगु पासय् बक्स दुनेया भलि यानाः वय्कलं गोल याःगु खः । बंगलादेश अन हे मदिउ । कासाया ७७ औं मिनेटय् हानं छक्वः सागोरिकां बक्स दुने प्रहार याःगु प्रहार गोलय् परिणत जुल । थ्वलिसें बंगलादेशं नेपाःयात ४–० गोलं बुकाः च्याम्पियन जुल ।
बंगलादेशं खुगू हे कासा त्याकाः १८ ल्याः हयाः च्याम्पियन जूगु खः । नेपालं ६ कासा म्हिताः ४ जित व २ हार यानाः १२ ल्याः सहित निगूगु थासय् लाःगु खः । न्हापांगु कासाय् नेपाः बंगलादेशलिसे ३–२ गोलं बूगु खः ।
बंगलादेशलिसे बुगु बाहेक नेपालं श्रीलंका व भुटानलिसे प्रभावशाली रुपं त्याकूगु खः । निगुलिं कासाय् श्रीलंकायात ७–० व न्हापांगु कासाय् भुटानयात ६–१ व निगूगु कासाय् ८–० गोलं बुकूगु खः ।
