येँ/संस्कृतिविद् प्रेममान डंगोलं च्वयादीगु ‘चित्रमय चाडपर्वको देश : नेपाल’ सफू नेपाल स्रष्टा समाजया ग्वसालय् जूगु छगू ज्याझ्वःया दथुइ मूपाहां प्रा.डा. लक्ष्मणप्रसाद गौतम, पाहांपिं इतिहासविद् डा. पुरुषोत्तम लोचन श्रेष्ठ, संस्कृति अध्येता शीतल गिरी लगायतं मंकाःकथं विमोचन यानादिल । समाजया अध्यक्ष श्रीओम श्रेष्ठ ‘रोदन’या सभापतित्वय् जूगु उगु ज्याझ्वलय् विमोचन जूगु सफूया समीक्षा यासें डा. पुरुषोत्तम लोचन श्रेष्ठं थ्व सफू नेपालमण्डलया जात्रापर्व व संस्कृतिया विश्वकोष खः धयादिसें संस्कृति अध्ययन व अनुसन्धान याइपिनिगु निंतिं थ्व सफू तसकं उपयोगी जुइगु खँ धयादिल । अथे हे सफूया बारे समीक्षा यासें शीतल गिरीं नेवाः समुदाय संस्कृति व परम्पराया धनी जूगु खँ न्ह्यथँसें थुगु सफुतिइ जात्रापर्व व संस्कृतियात सूचनामूलकढंगं दुथ्याकातःगुलिं थ्व सफू संग्रहणीय जूगु खँ धयादिल ।
सफूया च्वमि प्रेममान डंगोलं नेपाः तान्त्रिक देय् जूगु धासें थनया जात्रापर्व, कला, संस्कृति व सभ्यता तान्त्रिक रुपं न्ह्यानाच्वंगु खँ धयादिल । सभापतिया थासं न्वंवासें समाजया अध्यक्ष श्रीओम श्रेष्ठ रोदनं थौंकन्हे झीगु संस्कृति ल्वःमंकाः आधुनिकता व पिनेया संस्कृतिइ न्ह्याइपुकेगु अप्वयाःवंगुलिं थुगु सफुतिं झीगु संस्कृति, परम्परा व नखःचखःयाबारे बांलाक थुइकाबीगु व थुकिया बारे अध्ययन याइपिनिगु निंतिं थ्व महत्वपूर्ण कृति जूगु खँ धयादिल ।
