उत्कृष्ट प्रस्तुति न्ह्यब्वःम्ह कलाकार : चन्द्रा श्रेष्ठ

येँ/स्वंगू दशक न्ह्यःनिसें निरन्तर कला सिर्जनाय् सक्रिय कलाकार चन्द्रा श्रेष्ठं थःगु कलाया माध्यमं देय् दुने व अन्तर्राष्ट्रिय ख्यलय्तक लोकंह्वाःम्ह खः । वय्कःया पोट्र्रेटत नेपालय् जक मखु अन्तर्राष्ट्रिय कला प्रदर्शनी नं न्ह्यब्वयाः लोकंह्वाःगु दु ।
नेपाल आर्ट काउन्सिल, बबरमहलय् न्ह्याःगु हिमालयन आर्ट फेस्टिभलय् वय्कःया सिर्जना प्रदर्शित जूगु दु । थुगु कला महोत्सवय् नेपाःया १४० म्ह कलाकारपिनिगु चित्रकला दुथ्याःगु दु । व मध्ये चन्द्रा श्रेष्ठं समुद्रया छालनापं स्वापू दुगु ७ गू चित्रकला न्ह्यब्वयादीगु दु । वय्कःया चित्रकलाय् सुथय्, न्हिनय् व सन्ध्याईया बिस्कं बिस्कं समुद्रया रूप, रंग व लययात न्ह्यब्वःगु दु ।
कलाकार चन्द्रा श्रेष्ठया थ्व प्रस्तुति, गुकी ई, प्रकृति व संवेदनशीलताया सम्मिश्रण खनेदु । हिमालयन आर्ट फेस्टिभलया आकर्षणमध्ये थ्व नं छगू खः । वय्कःया कलाय् अमूर्त (abstract) व अर्ध–अमूर्त (semi–abstract) निगूकथंया अभिव्यक्ति खनेदु । गुकिं यानाः दर्शकपिन्त चित्रनापं प्रत्यक्ष खँल्हायेगु अवसर बिइ, अले अर्थ व भाव दर्शकया दृष्टिइ निर्भर जुइ ।
यद्यपि, प्रदर्शनीइ वःपिं दर्शक व कला–रसिकपिन्सं चन्द्राया सिर्जनशीलता व मौलिक दृष्टिकोणया प्रशंसा याःगु दु । वय्कःया श्रृजनां नेपाःया कला क्षेत्रय् न्हूगु बिचाः व रूपया अभिव्यक्ति बिइगु विश्वास याःगु दु । – हिकमत डंगोल