यल/डा. ज्योति तुलाधरं च्वयादीगु ‘आधुनिक काव्य व विद्रोहया सः – छगू विश्लेषण’ समालोचना संग्र्रह सपूm पाटन संग्रहालय परिसरय् कविताया लाय्कूया ग्वसालय् जूगु छगू ज्याझ्वःया दथुइ वरिष्ठ साहित्यकारपिं प्रा. नर्मदेश्वर प्रधान, डा. योगेन्द्र प्रधानाङ्ग, प्रतिसरा साय्मि, सुरेशकिरण मानन्धर व रजनी मिलां मंकाःकथं विमोचन यानादिल ।
नेपालभाषा एकेडेमीया चान्सलर मल्ल के. सुन्दरया मूपाहांसुइ जूगु उगु ज्याझ्वलय् सफूया बारे प्रा. प्रेमशान्ती तुलाधरं समीक्षा यानादीगु खः । विमोचन जूगु सफुतिइ वरिष्ठ साहित्यकारपिं छसिकथं पूर्ण वैद्यया आधुनिक काव्य यात्राया सार, आनन्द जोशीया कविताय् बिचाः व भावनाया संलयन, डा. योगेन्द्र प्रधानया आक्रोश प्रशान्त सागरया लबुइ उपनिवेशवादया कलंक, श्यामसुन्दर सँय्जुया काव्य धाःया विशिष्ट प्रकृति, महाकवि गिरिजाप्रसाद जोशीया काव्य रचनाया उद्देश्य, प्रा. नर्मदेश्वर प्रधानया कविताय् प्रतीकात्मक शैली, बुद्ध साय्मिया विद्रोहया सः, प्रतिसरा साय्मिया कविताय् नारी प्रतिरोधया सः, सुरेशकिरण मानन्धरया उत्तर आधुनिकताया लँपुइ व रजनी मिलाया काव्य चिन्तनया विविध आयामया बारे समालोचना डा. ज्योति तुलाधरं यानादीगु दु ।
कविताया लाय्कूया नायः डा. ज्योति तुलाधरया सभापतित्वय् जूगु उगु ज्याझ्वलय् कविताया लाय्कूयात अझ स्तरीय रुपं न्ह्याकायंकेगु निंतिं वैचारिक समूह गठन यानाः २४ म्ह साहित्यकारपिन्त मानार्थ दुजः मनोनयन याःगु दु ।
